ب قانوونێ عیراق یا دھێتە پارچەکرن
ئەڤرۆ نيوز:
ئەندامەکێ پەرلەمانێ عیراقێ ل سەر لیستا پارتی دیارکر کو کار یێ ل سەر پرۆژە قانوونەکێ دھێـتەکرن بۆ پێکئینانا زێرەڤانێن نشتیمانی ژ ھەر پارێزگەھەکێ بۆ بەرگریێ ژ وێ پارێزگەھێ، ل دووڤ گۆتنێن ڤی پەرلەمانتاری ئەڤە دبیتە پێنگاڤا ئێکێ کو ب قانوون عیراق بھێتە پارچەکرن.
حاکم سەرحان سلێڤانەی، بۆ رۆژناما ئەڤرۆ گۆت” قانوونا نوکە کار ل سەر دھێتەکرن، پێکئینانا زێرەڤانێن نشتیمانی یە و ھەر پارێزگەھەکێ ماف ھەیە ژ پێھکاتێن خوە ب خوە زێرەڤانان بۆ بەرگریێ ژدەڤەرێن پارێزگەھا خوە پێک بینیت و ئەڤە تنێ بۆ پارێزگەھانە و ژ ھەرێما کوردستانێ ناگریت، ئەڤ لەشکرە دێ بەرگریێ ژ وێ پارێزگەھێ کەت و ئەڤ پرۆژە قانوونە دێ دبەرژوەندا لایەنێ سوونی دا بیت”.
ل دۆر کەرکووکێ و دەڤەرێن مادێ ١٤٠ ، حاکم سەرحانی گۆت” ھەر لەشکرەکێ وان دەڤەران و کەرکووکێ بھێتە پێکئینان دڤێت چو پێنگاڤان نەھاڤێژیت بێ ئاگەھدارکرنا وەزارەتا پێشمەرگەی، چونکی دەڤەرێن شنگالێ و زمارێ نوو ھاتینە ئازادکرن و ھەتا نوکە ب دەستێن پێشمەرگەی ھاتینە پاراستن و کوردان گەلەک شەھید داینە و کورد قەبوول ناکەن مایتێکرن ل ئەڤان دەڤەران بھێتەکرن”.
ئەو چەندە ژی گۆت” دەڤەرێن سوونە نشین دێ مفاداربن ژ ڤێ پرۆژە قانوونێ و ھەر ئەو ب خوە دێ دەستھەلاتا لەشکری ل دەڤەرێن خوە وەرگرن، ئێک ژ ئەگەرێن ژ دەست دانا مووسلێ ئەو بوو کو لەشکرێ عیراقێ ئەوێ ل مووسلێ نە خەلکێ وی باژێری بوون و د بەرھەڤ نەبوون خوە بۆ مووسلێ بدەنە کوشتن، بەرۆڤاژی ھەکە خەلکێ وی باژێری بیت دێ بەرگریێ ژێ کەت”.
سەرحانی گۆت” ئەڤ پرۆژە قانوونە حوکمەتا عیراقێ یێ بەرھەڤکری و پێشکێشی پەرلەمانێ عیراقێ کری و ھەموو کار بۆ ھاتیەکرن و تنێ مایە بکەڤیتە بەر دەنگدانێ و ھەر دەمێ ھاتە پەسەندکرن، دێ کەڤیتە د وارێ بجھئینانێ دا، بەلێ ھەتا نوکە دیارنەبوویە کا دێ ھژمارا ڤی لەشکری بۆ ھەر پارێزگەھەکێ چەند بیت”.
