ب وێنه: ئاڤاهیێ چاڤدێریكرنا كچێن بێ سه‌میان ل دهۆكێ هاته ڤه‌كرن
ئه‌ڤرۆ نيوز:
ئه‌ڤرو سپێدێ 14-9-2017ب ئاماده‌بونا به‌رێز فرهاد ئه‌مین ئه‌تروشی پارێزگه‌رێ دهوكێ و(ئیڤا داردا كوڤا) كونسلا گشتی یا وه‌لاتێ چیك ل كوردستانێ وچه‌ند رێڤه‌به‌رێن فه‌رمانگه‌هێن میری ئاڤاهیێ چاڤدێریكرنا كچێن بێ سه‌میان هاته ڤه‌كرن. پاش گه‌ریانه‌ك ل ناڤ ئاڤاهیێ هاته كرن وژنێزیك سه‌حكره ژور وهولێن ئاڤاهی.
پاش دپرێس كونفرانسه‌كیدا پارێزگه‌رێ دهوكێ سوپاسیا وه‌لاتێ چیك وبالیوزخانه وكونسلخانا گشتی یا وی وه‌لاتی كر كو دراڤێ پێدڤی ته‌رخانكریه بوئاڤاكرنا ئاڤاهیێ چاڤدێریكرنا كچێن بێ سه‌میان هه‌روه‌سا سوپاسیا ئه‌ندازیار وكارمه‌ندێن فه‌رمانگه‌هێن ئه‌شغال ونێشته‌جێكرنێ وچاڤدێریا جڤاكی كر كو ب ئاڤاكرنا پروژه‌ی رابوینه وپیروزباهیا وان زاروكان كر یێن دناڤا ئاڤاهیی دا دهێته په‌روه‌رده‌كرن وته‌كه‌زكر كو زاروك پاشه‌روژا ملله‌تی نه ودڤێت گرنگییه‌كا تایبه‌ت پێ بهێته دان دا هه‌ست ب بێ خودانیێ نه‌كه‌ن.
هه‌ربڤێ هه‌لكه‌فتێ كونسلا وه‌لاتێ چیك په‌یڤه‌ك پێشكێشكر وگوت: خوشحالم كو ئه‌ڤ ئاڤاهیه ب پشته‌ڤانیا وه‌لاتێ مه چیك بو زاروكێن بێ سه‌میان هاتیه دورستكرن وته‌كه‌زكر كو دڤێت گرنگی ب زاروكان بهێته دان دا ئه‌وژی ل پاشه‌روژێ ببنه مروڤێن ئاڤاكه‌ر وئه‌م حه‌زدكه‌ین پشتی ئه‌ڤ زاروكه مه‌زن دبن بێژن چیكی دوستێن مه‌نه.
هه‌ژی گوتنێ یه حكومه‌تا چیك ب رێكا بالیوزخانه وكونسلخانه‌یا وه‌لاتێ خو ل به‌غدا وهه‌ولێرێ (208) هزار دولار ته‌رخانكرینه بو بجهكرنا پروژه‌ی.
پروژه ژ 9 هول وژورێن دی یێن كارگێری وباخچه‌یان پێك دهێت دهێته چاڤه‌رێكرن پترژ 25 كچێن بێ سه‌میان لێ بهێنه خودانكرن وپه‌روه‌رده‌كرن.
