ب وێنه – ئه‌ڤ ساله 507 ته‌نێن هژیران ل ئاكرێ هاتینه به‌رهه‌مئینان
ئه‌ڤرۆ نیوز ، نه‌وزاد هلۆرى:
باژێرێ ئاكرێ ب هه‌موو ناحى و گوندێن خوڤه ب ده‌هان جورێن فێقى و ده‌رامه‌ت و چاندن و ب خودانكرنا ته‌رش و كه‌والى ناڤداره ، ئێك ژ وان به‌رهه‌مێن هاڤینى به‌رهه‌مئینانا هژیرایه كو ئه‌ڤ ساله زێده‌ترى 507 ته‌نێن هژیران هاتینه به‌رهه‌مئینان.
دڤى واریدا ” ئه‌حمه‌د جه‌میل ئه‌بو زێد ” رێڤه‌به‌رێ چاندنا ئاكرێ بۆ ئه‌ڤرۆ نیوز گۆت: ( به‌رهه‌مئینانا هژیران ل سنوورێ قه‌زا ئاكرێ ئێكه ژ به‌رهه‌مێن هه‌رى گرنگ و پر داهات ل باشوورێ كوردستانێ و پارێزگه‌ها دهۆك و سالانه خه‌لكه‌كێ زور ب رێیا فرۆتن هژیران ده‌ستخوڤه دئینن ، و ئه‌ڤ ساله زێده‌ترى 507 ته‌نێن هژیران ل سنوورێ قه‌زا ئاكرێ هاتینه به‌رهه‌مئینان)
زێده‌تر گۆت: ( سه‌ره‌راى كو به‌رهه‌مئینانا هژیران لسه‌نته‌رێ قه‌زایێ و ناحیێن ده‌وروبه‌ر و هه‌موو گوندان هه‌یه ، به‌لێ زورترین ریژه‌یا به‌رهه‌مئینانا هژیران ل هه‌ردوو ناحیێن بجێل و دینارتێ بوویه)
ل سنوورێ قه‌زا ئاكرێ 23 هزار دارێن هژیران د 382 دونه‌مێن زه‌ڤیان داد هێنه به‌رهه‌مئینان و پرانیا هژێرێن ئاكرێ ژى بو باشوور و ناڤه‌راستا عیراقێ و ده‌رڤه دهێنه ره‌وانه‌كرن و پشكه‌ك ژى دهَنه هنارتن بو پارێزگه‌هێن هه‌رێمێ و رێژه‌كا زور ژى ب رێیا گه‌شتیاران دهێنه فروتن ، رێڤه‌به‌رێ چاندنا ئاكرێ هوسا گوت.
رێڤه‌به‌رێ چاندنا ئاكرێ دیاركر ژى كو ئه‌ڤ ساله به‌رامبه‌ر سالێن بورى رێژه‌یا به‌رهمئینانا هژیران كێمبوویه به‌لێ د به‌رامبه‌ر دا بهایێ وان بلندتره و گۆت ژى: ( ئه‌گه‌را سه‌ره‌كى یا كێمبوونا رێژه‌یا به‌رهه‌مئینانا هژیران دزڤریت بو تێكچوونا ره‌وشا كه‌ش و هه‌وایى و بلندبوونا پله‌یێن گه‌رمایێ ،به‌لێ د به‌رامبه‌ر دا كێموبونا وان بویه سه‌ده‌م كو بهایێ وان هه ب بلندى بمینیت و خوساته‌كا زور لسه‌ر هه‌بیت و دنهادا كیلویا هژیران هه‌تا پێنج هزار دیناران ژى دهێته فروتن)
ل دوماهیێ گۆت: (باشترین هژیر ل ئاكرێ هژیرا ئه‌حیا به‌گه ، و رێژه‌یه‌كا زورا هژیران ژى بو مه‌ره‌مێن مره‌با و كه‌تكه هژیران دهێنه بكارئینان ، و ئه‌گه‌ر كارگه‌هه‌ك ل ئاكرێ هه‌بایه دا وه‌لاتى زێده‌تر مفاداربن وه‌كو داهات)
