ب وێنه – ب كوژمێ زێدترى 15 ملیون دیناران زیان ب پرۆژه‌یه‌كێ ماسیان كه‌فت
ئه‌ڤرۆ نیوز ، نه‌وزاد هلۆرى:
ژ ئه‌گه‌را برینا كاره‌با گشتى لسه‌ر پرۆژه‌یه‌كێ ب خودانكرنا ماسیان ل گونده‌كێ ناحیا شێلادزێ یا سه‌ر ب قه‌زا ئامێدیێ زێده‌ترى 15 ملیون دیناران زیان پێكه‌فتن.
دلوڤان شاجى خودانێ پرۆژێ ماسیێن هلورا ل گوندێ هلورا یا سه‌ر ب قه‌زا ئامێدیێ بو ئه‌ڤرۆ نیوز گۆت: (دره‌نگى یا شه‌ڤێ كاره‌با گشتى لسه‌ر پرۆژه‌ى هاته‌برین و هه‌تا سپێدێ نه‌هات ڤه ، ئه‌ڤ یه‌ك ژى بوویه سه‌ده‌م كو ئوكسجینا ده‌ستكرد د ناڤ ئاڤێ دا نه‌مینیت و هه‌موو ماسیان بكوژیت)
زێده‌تر گۆت: (دوو حه‌وزێن ماسیان من هه‌نه به‌لێ تنێ ماسیێن حه‌وزه‌كێ مرینه ژبه‌ركو ماسیێن ئه‌و حه‌وزا مایى ئاڤا وێ كێمتر بو و بتنێ ئێك ژێده‌رێ ئوكسینێ ژى هه‌بوو و به‌رگریا هه‌تا سپێدێ نه‌كر ب تایبه‌تى ژى شه‌ڤ بخوه ژى هاریكاره بوو نه‌مانا ئوكسجینێ لسه‌ر پروژه‌ى ، ئه‌ڤه بویه سه‌ده‌م كو ماسیێن حه‌وزه‌كێ كو زێده‌ترى سێ هزار ماسیان تێدابوون بمرن و كارتێكرنێ ل مرنا هنده‌كێن دن بكه‌ت)
ل گوره‌ى ئاخفتنێن دلوڤانى لژنه‌كا تایبه‌ت ل رێڤه‌به‌ریا چاندنا ئامێدیێ سه‌ره‌دانا پرۆژه‌ى كریه و ل گوره‌ى خه‌ملاندنێن وان زێده‌ترى دوو هزار ماسیان مرینه كو سه‌نگا وان دناڤبه‌را كیلویه‌ك بو سێ كیلویان بویه ، و هه‌ر كیلو ب شه‌ش هزار دیناران دهاته فروتن و بڤێ یه‌كێ ژى ب كوژمێ زێده‌ترى 15 ملیون دیناران زیان ب پروژێ وى یێ ماسیان گه‌هشتیه.
دلوڤان شاجى دیاركر ژى كو ئه‌وان زێده‌ترى سێ ده‌فته‌رێن دولارى مه‌زاختن ل پرۆژه‌ى كریه و زێده‌ترى ساله‌كێ ژى ئه‌و ماسى ب خودانكربوون و گۆت ژى: ( دخوازم كو حكومه‌ت هه‌ڤكاریا من بكه‌ت داكو بكارم جاره‌ك دن پرۆژه‌یێ خوه‌یێ ماسیان بدانم ڤه ، و ئه‌گه‌ر ئه‌ز ئه‌و ماسێن حه‌وزا مایى ب زوترین ده‌م نه‌فروشم دبیت ئه‌و ژى بمرن)
