ب وێنه وڤيديۆ – هرچا گاره‌ى رێژا گه‌شتیاران زێده‌كر
ئه‌ڤرۆ نیوز، نه‌وزاد هلۆرى:
پشتى كو ل حه‌فتیا بۆرى رێكخراوه‌كێ سێ هرچ ل چیایێ گاره‌ى ل قه‌زا ئامێدیێ ئازادكرين، ئێك ژ وان هرچان چوویه د ئاڤاهیێ كۆچكا سه‌دامى دا و بوویه ئه‌گه‌ركو هژماره‌كا مه‌زن یا گه‌شتيار و وه‌لاتیان بۆ دیتنا وێ قه‌ستا چيایێ گاره‌ى بكه‌ن.
حاجى به‌رگاره‌ى، وه‌لاتیه‌كێ ئێك ژ گوندێن به‌رێ گارێ یه ل سنورێ قه‌زا ئامێدیێ بۆ ئه‌ڤرۆ نیوز گۆت” ئه‌م وه‌كو وه‌لاتیێن به‌رى گاره‌ى دلخوه‌شین كو هرچ ل گاره‌ى هاتینه به‌ردان و زێده‌بارى كو دێ ژینگه‌ها ده‌ڤه‌رێ جوان كه‌ت و گه‌شتیاران بۆده‌ڤه‌رێ كێشیت، دهه‌مان ده‌م دا ئه‌م ب مه‌ترسى ژى نابینین بۆ سه‌ر ژیانا وه‌لاتیان و جوتیار و مێشه‌ڤانان”.
زێده‌تر گۆت” ئه‌و هرچێن ل گاره‌ى هاتینه ئازادكرن جۆره كه‌هى بوونه‌ك هه‌یه و ب چو شێوه‌یان زیانێ ناگه‌هینن كه‌سێ و ئه‌م هه‌موو وان نووچه‌يان ره‌ت دكه‌ین كو به‌حس ل مه‌ترسیا وان دكه‌ن، به‌لكو به‌روڤاژى ئازادكرنا هرچان بوویه ئه‌گه‌ر كو رێژه‌یا گه‌شتیاران بۆ ده‌ڤه‌رێ ب تایبه‌تى چیایێ گاره‌ى زێده بیت”.
بلند بریفكانى، سه‌رۆكێ رێكخراوا هاریكاريا “كوردى ئه‌مریكى ” كو وێ رێكخراوێ ئه‌و سێ هرچ ل چیایێ گاره‌ى ئازادكربوون، بۆ ئه‌ڤرۆ نیوز گۆت” پشتى كو مه سێ هرچ ل چیایێ گاره‌ى ئازادكرین، ئێك ژ وان ل ده‌ردورێن كۆچكا سه‌دامى مایه و بوویه ئه‌گه‌ر كو خه‌له‌كێ زور قه‌ستا چیایێ گاره‌ى بكه‌ت بۆ دیتنا وێ و ئه‌م ژى جار جار ژ نێزیك سه‌ره‌دانا كۆچكێ و و هرچێ دكه‌ین”.
زێده‌تر گۆت”سه‌ره‌راى كو هرچێ چو مه‌ترسى بۆ سه‌ر ژیانا وه‌لاتیان و گه‌شتیاران نینه ، به‌لێ ل گه‌ل ڤێ یه‌كێ ژى دبێژین پێدڤیه وه‌لاتى و گه‌شتیار خوه ب پارێزن و گه‌له‌ك خوه نێزیك نه‌كه‌ن ، ئه‌ڤ هرچا كو ل ده‌ردورێن كۆچكا سه‌دامى ماى جۆره تێكه‌لیه‌ك ل گه‌ل مرۆڤان هه‌یه و زیانێ ل مرۆڤان ناكه‌ت هه‌كه ئه‌زیه‌تا وێ نه‌هێته‌كرن”.
ب گۆره‌ى زانیاریان ئه‌و هرچا كو ل نێزیك كۆچكا سه‌دامى مای ب دووڤ خوارنێ دگه‌ریێت و هه‌كه خوارن و ڤه‌خوارن هه‌بیت ب چو شێوه‌یان ئه‌و ناهێته نێزیكى كۆچكێ و وه‌لاتى و گه‌شتیار و پێشمه‌رگه‌یێن ناڤا كۆچكا سه‌دامى دا دخوازن كو لایه‌نێن شوله‌ژێ خوارن و ڤه‌خوارنان بۆ وێ هرچێ بینن یان ببه‌ن جهه‌كێ كو خوارن و ڤه‌خوارن لێ هه‌بیت”.
