ب وێنه وڤيديۆ:به‌لاڤ نه‌كرنا گازێ بازارێ ده‌واران گه‌رم كريه
ئه‌ڤرۆنيوز، نه‌وزاد هلۆرى:
به‌لاڤ نه‌كرنا گازێ ژلایێ حوكمه‌تا هه‌رێما كوردستانێ ڤه بوویه ئه‌گه‌ر كو خه‌لك بۆ كۆمكرنا داران په‌نایێ بو كرینا ده‌واران ببه‌ت و ئه‌ڤ یه‌كێ بازارێ ده‌واران گه‌رم كریه و دئه‌نجام دا زیانێن مه‌زن ب ژینگه‌ه و دارستانێ كه‌فتن.
زیاد عه‌بدوللا ئێكه ژ وه‌لاتیێن شێلادزێ و ل چیایى دزڤرى و چه‌ند ده‌وارێن بارگرى ل گه‌ل بوون بو ئه‌ڤرۆ نیوز گۆت” ژبه‌ر به‌لاڤ نه‌كرنا گازێ ئه‌م رۆژانه سپێدێ دچینه چیایى بۆ كرنا داران ب ده‌واران و ئێڤارى دزڤرین و هنده‌ك ژ وان داران د فروشین و هنده‌كان ژى بۆ مال و زڤستانێ دهێلین”.
زيادى زێده‌تر گۆت” بهایێ بارێ ده‌واران دناڤبه‌را 15 هزار بۆ 20 هزار دیناران دهێته فروتن”.
محه‌مه‌د عومه‌ر ئێكه ژ بازرگانێن كرین و فروتنا ده‌واران ل سنورێ قه‌زا ئامێدیێ دیاركر كو به‌لاڤ نه‌كرنا گازێ بوویه ئه‌گه‌ر خه‌لكه‌كێ مه‌زن به‌ر ب كرینا داران ڤه بچیت و بۆ ئه‌ڤرۆ نیوز گۆت”ل ده‌ف من سێ جۆرێن ده‌واران يێن هه‌ين ، ئه‌و ژى هه‌سپ و هێستر و ماهینن و هنده‌ك جاران ژى گوهدرێژان دئینم و دناڤبه‌را 300 دۆلار بۆ 3500 دۆلاران كرین و فروتن پێ دهێته‌كرن و ئه‌ز هه‌موو ڤان ده‌واران ژ توركیا و ئیرانێ دئینم”.
دياركر ژى” خه‌لك پتر ده‌وارێن ژ جۆرێ هێستر دكریت ب تایبه‌تى هێسترا كه‌سك، ژ به‌ركو وه‌غه‌را وێ یا ب خێره و ده‌واره‌كى خوه راگره و بۆ كارى یا ب هێزه ، پتریا جاران ژى خه‌لكێ گوندان و خه‌لكێ ل سه‌ر سنوران ده‌واران دكرن”.
ل دووڤ پێزانينان، رۆژانه رێژه‌كا مه‌زن یا وه‌لاتیان قه‌ستا ده‌ڤه‌رێن چیایى دكه‌ن بۆ كومكرنا داران و ئه‌ڤ یه‌ك ژى بوویه ئه‌گه‌ر كو گوهۆ‌رين ل سه‌ر تێكدانا ژینگه‌هێ بهێته‌كرن.
