ب وێنه و به‌لگه: په‌يكه‌رێ شه‌هيد هۆجام نه‌هاتيه شكاندن
ئه‌ڤرۆ نيوز، شه‌وكه‌ت محه‌مه‌د، رزوان رۆژبه‌يانى:
محه‌مه‌د سلێمان به‌رپرسێ پاسه‌وانان ل پۆليسێن رۆڤيا بۆ ئه‌ڤرۆ نيوز گۆت: “ئه‌ڤ نووچێن هاتينه به‌لاڤكرن كو په‌يكه‌رێ شه‌هيد هۆجام سورچى يێ هاتيه شكاندن د دوورن ژ راستيێ و چو راستى بۆ نينه و ب شه‌ڤ و رۆژ پاسه‌وانێن مه چاڤدێريێ لێ دكه‌ن”.
زێده‌تر گۆت: “ئه‌و وێنێ ل تۆڕێن جڤاكى به‌لاڤ بوويى و دايه زانين كو په‌يكه‌رێ شه‌هيد هۆجامه، يێ پارێزگه‌ها سلێمانيێ و هه‌له‌بچه‌يه كو به‌رى نوكه ب وى ره‌نگى سه‌ره‌ده‌رى ل گه‌ل هاتيه كرن”.
د هه‌مان ده‌م دا، سه‌ركه‌وت ئه‌يۆب سكرتێرێ رێڤه‌به‌رێ ناحيا رۆڤيا بۆ ئه‌ڤرۆ نيوز گۆت: “بۆ ماوێ 24 ده‌مژمێران زێره‌ڤانێن تايبه‌ت ب ناحيێ ڤه دداناينه و چو كه‌س نه‌شێت ده‌ست درێژيێ بكه‌ته سه‌ر په‌يكه‌رێ”.
زێده‌تر گۆت: “گه‌له‌ك كه‌يفا خه‌لكێ ناحيا رۆڤيا يێ پێ هاتى و تشته‌كێ نوويه و گه‌له‌ك رێزێ ل وى په‌يكه‌رى دگرن يێ بۆ شه‌هيد هۆجام سۆرچى ڤه هاتيه چێكرن”.
ب گۆره‌يى ئه‌و وێنێن ل تۆڕێن جڤاكى به‌لاڤبووين، ئه‌ڤێن ل خوارێ به‌لگه‌يێن ئه‌ڤرۆ نيوزن كو پشت راست دكه‌ت ئه‌و په‌يكه‌رێ هاتيه شكاندن نه يێ شه‌هيد هۆجام بوويه.
ب ره‌نگه‌كێ گشتى ده‌ما مرۆڤ هه‌موو تشتان دده‌ته به‌ر ئێك ديار دبيت كو هه‌ردو وێنه نه ئێكن، به‌لێ ئه‌ڤێن ل خوارێ گرنگترين چار خالن كو ئه‌ڤرۆ نيوز ده‌ستنيشان كرين:
1- هه‌كه ته‌ماشه‌يى هه‌ردو ژماره (1) يێن د ناڤ وێنه‌يى دا بكه‌ين دێ بينين د په‌يكه‌رێ دروست يێ شه‌هيد هۆجام سورچى دا كولاف د سه‌رى نينه، به‌لێ د په‌يكه‌رێ دويێ دا كولاف يێ د سه‌رى هه‌يى.
2- ئالايێ كوردستانێ: د وێنێ دويێ دا دياره كو ئالايێ كوردستانێ ب ئاسنى هاتيه دروست كرن، به‌لێ ل گه‌ل په‌يكه‌رێ شه‌هيد هۆجام چو ئالايێن ژ وى ره‌نگى نينن، ئالايێ كوردستانێ يێ دروست نه‌بيت، ئه‌وێ ب سوونه‌كێ ڤه هاتيه بلند كرن.
3- خالا سيێ گه‌له‌ك ب روونى يا دياره، ئه‌و جهێ په‌يكه‌ر ل سه‌ر هاتيه دانان و ئه‌و نڤيسينێن ل سه‌ر هه‌ين كو ب هه‌موو ره‌نگان نه‌وه‌كو ئێكن و گه‌له‌ك ژێك د جودانه.
4- دووماهى تشت يێ پێدڤى كو بهێته گۆتن ئه‌و ديمه‌نه يێ ل پشت په‌يكه‌رێ شه‌هيد هۆجام ده‌ردكه‌ڤيت و يێ ل پشت وى په‌يكه‌رێ دى ده‌ردكه‌ڤيت كو يێ په‌يكه‌رێ دويێ ديواره‌كێ نه‌چێكرى و ئاخ تشتێن ژ وى ره‌نگى نه و يێ شه‌هيد هۆجام ل به‌ر ده‌رگه‌هێ رێڤه‌به‌ريا ناحيا رۆڤيا هاتيه دانان.
تێبينى: وه‌كو ئه‌ڤرۆ نيوز داخوازا لێبۆرينێ ژ خوانده‌ڤانێن خوه دكه‌ين كو ژ ده‌سپێكێ ژ ئه‌گه‌رێ له‌زاتيا دگه‌هاندنێ دا، ئه‌م ژى هاتبووينه خاپاندن و مه وه‌سان هرز كربوو ئه‌و په‌يكه‌ره و به‌لاڤكربوو، له‌روا دووباره داخوازا لێبۆرينێ دخوازين.
