ب وێنه و ڤيديۆ: ساخله‌ميا ئامێديێ ته‌رمێن شه‌هيدێن بۆردۆمانا توركيا راده‌ستى خێزانێن وان دكه‌ت
ئه‌ڤرۆ نيوز، نيوار :
سێ وه‌لاتيێن ئه‌ره‌دنى ژ ئه‌نجامێ بۆردۆمانێن فرۆكێن شه‌رى يێن وه‌لاتێ توركيا ل گۆندێ ئه‌ره‌دنا كه‌ڤن هاتنه شه‌هيد كرن.
عيماد يونس كه‌سه‌كێ نێزيك ژ وان شه‌هيدانه بۆ ئه‌ڤرۆ نيوز ئاشكه‌را كر كو شڤێدى ئه‌و سێ كه‌س چووبوونه گۆندێ كه‌ڤن ب مه‌ره‌ما چاڤدێريكرنا مه‌رومالاتێ خوه، به‌لێ ژ لايێ فرۆكێن توركيا ڤه هاتينه بۆردۆمانكرن و هه‌رسێ كه‌سان گيانێ خوه ژ ده‌ست دايه.
ئاشكه‌را ژى كر كو ئه‌و سێ كه‌سه ب ناڤێ (دلۆڤان سالح، ره‌مه‌زان ئه‌حمه‌د و ئيسماعيل حه‌سه‌ن)ن كو خۆجهێن هه‌ر ئێك ژ ئه‌ره‌دنا و سه‌رسنگى نه، “دو ژوان ژى پێشمه‌رگه نه و ئێك ژى كادرێ حزبى يه”.
دا زانين ژى كو نوكه ساخله‌ميا ئامێديێ پشتى ل نوشداريا داد پشكنين بۆ ته‌رمێن وان شه‌هيدان كرين، راده‌ستى خێزانێن وان كرن ب مه‌ره‌ما ڤه‌شارتنێ كو بڕياره ل قه‌دش راده‌ستى ئاخێ بهێنه كرن.
