ب وێنه: 30 ساليا ئه‌نفالان ل دهۆكێ هاته ساخكرن
ئه‌ڤرۆ نيوز:
به‌رى ده‌مه‌كێ كێم 30 ساليا ئه‌نفالێن بادينان ل كه‌لها نزاركێ ل دهۆكێ هاته ساخكرن و د په‌يڤه‌كێ دا نێچيرڤان بارزانى راگه‌هاند كو ئه‌نفالێن دهۆكێ دووماهيا پرۆسا ئه‌نفالان بوو.
نێچيرڤان بارزانى سه‌رۆك وه‌زيرێن هه‌رێما كوردستانێ د په‌يڤه‌كێ دا راگه‌هاند كو ماوه‌كه ل جڤاتا وه‌زيران لژنه‌ك بۆ قه‌ره‌بووكرنا كه‌سوكارێن ئه‌نفالكريان پێكهاتيه و هيڤيدارين ل گه‌ل به‌غدا بگه‌هنه رێكه‌فتنێ.
د ڤى رێ و ره‌سمى دا ب ئاماده‌بوونا گه‌له‌ك قونسلێن وه‌لاتێن جيهانێ ل هه‌رێما كوردستانێ و كه‌سوكارێن ئه‌نفالكريان و به‌رپرسێن حزبى و حكومى دێ رووفاتێن 13 قوربانيێن ئه‌نفالكريان هێنه ڤه‌شارتن.
ب گۆره‌يى ئامارا كاروبارێن شه‌هيد و ئه‌نفالكريان ل دهۆك، د پرۆسا ئه‌نفالێن بادينان دا دو هزار زه‌لام كۆمكۆژ كرن و بڕياره ئه‌ڤرۆ 1ى ئيلۆنا 2018ێ د رێ و ره‌سمه‌كى دا رووفاتێن 13 ئه‌نفالكريان ل قه‌لا نزاركێ ل دهۆكێ بهێنه ڤه‌شارتن.
ره‌جه‌ب گيزى، رێڤه‌به‌رێ گشتى يێ رێڤه‌به‌ريا شه‌هيد و ئه‌نفالكريان ل دهۆك ب وه‌كاله‌ت دبێژيت: “بۆ جارا ئێكێ ل ده‌ڤه‌را بادينان رووفاتێن 13 قوربانيێن ئه‌نفالكرى د رێ و ره‌سمه‌كى دا دێ هێنه ڤه‌شارتن”.
هه‌ر د ڤى رێ و ره‌سمى دا چه‌ندين چالاكيێن جوراجور كو ده‌ربڕين ژ ئێش و ئازارێن ملله‌تێ كورد و وان ده‌رده‌سه‌ريێن ب سه‌ر وان هاتين دكرن.
