ب وێنە – چالاكڤانێن ژینگه‌هى خرڤه‌بوونه‌كا نه‌رازیبوونێ ئه‌نجام دا
ئه‌ڤرۆ نیوز ، نه‌وزاد هلۆرى:
ژبه‌ر به‌لاڤ نه‌كرنا به‌هرا گازا سپى يا وه‌لاتيان ، چالاكڤانێن ژینگه‌ى و رێكخراوێن ژینگه‌هى ل سنوورێ قه‌زا سۆران خرڤه‌بونه‌كا نه‌رازیبوونێ ئه‌نجام دا و ل سه‌ر به‌رمیلا خالى یا گازێ داخوازكرن ب زووترین ده‌م به‌هرا وه‌لاتيان ژ گازا سپى بهێته دبه‌لاڤكرن هه‌كه دێ مه‌ترسى ل سه‌ر ژینگه‌هێ و برینا داران هه‌بيت.
هه‌ژار ئیدلیبى، سه‌رۆكێ رێكخراوا وار بۆ پاراستنا ژینگه‌هێ بۆ ئه‌ڤرۆ نیوز گۆت: (ب مه‌ره‌ما گه‌هاندنا په‌یاما وه‌لاتى و رێكخراوێن ژینگه‌هى و چالاكڤانان ، مه وه‌كو چالاكڤان و ره‌وشه‌نبیر و رێكخراوێن جڤاكى و ژینگه‌هى خرڤه‌بوونه‌كا نه‌رازیبوونێ ئه‌نجام دا و داخواز ل جهێن شوله‌ژێ كر كو ب زووترین ده‌م به‌هرا گازا سپى یا وه‌لاتیان دبه‌لاڤ بكه‌ن هه‌كه نه، دێ مه‌ترسیێن زور لسه‌ر ژینگه و دارستانا ده‌ڤه‌رێ هه‌بيت),
زێده‌تر گۆت: (خه‌لكێ ده‌ڤه‌را سۆران ل ده‌ڤه‌رێن چیایى دژین و سر و سه‌رمایه‌كا زۆر هه‌یه ، و چو ماله‌كا ده‌ڤه‌رێ نه‌شێت ب به‌رمیله‌كێ ژى بقه‌تینیت، به‌لكو دڤێت دو به‌رمیلێن نگازا سپى بهێنه به‌لاڤكرن ، ئه‌ڤرۆ مه ل سه‌ر به‌رمیلا خالى یا گازێ داخواز ژ جهێن شوله‌ژێ كر كو ب زووترین ده‌م گازا سپى به‌لاڤ بكه‌ن، چونكى ل ده‌ڤه‌را سۆران هه‌ر نوكه وه‌رزێ سه‌رمایێ ده‌ست پێ كریه و خه‌لكى پێدڤیه كا زور ب گازا سپى يا هه‌ى).
ناڤبرى دیاركر ژى كو وان ژبلى داخوازكرنا به‌هرا گازا سپى بۆ وه‌لاتيان، دهه‌مان ده‌م دا داخوازكر كو گازا سپى ل سه‌ر قوتابخانه و زیانڤێكه‌فتیێن له‌هیان ژى بهێته به‌لاڤكرن و زێده‌تر گۆت: (ل شوونا كو حوكمه‌ت پاره‌كێ زۆر بده‌ت ئه‌ندامێن په‌رله‌مانێ كوردستانێ و هه‌كه حوكمه‌ت نه‌هێته سه‌رخه‌ت، دێ فشار و خرڤه‌بوونێن مه دبه‌رده‌وام بن).
