ب وێنە – ھاڤینگەھا ئاڤا مارک پێدڤی ب خزمەتگوزاریێن بلەزە
ئەڤرۆ نیوز ، نەوزاد ھلۆری:
وەلاتی و خودان بازارێن ئاڤا مارک ل دەڤەرا رێکان یا سەر ب قەزا ئامێدیێ ددەتن دیارکر کو ژ ئەگەرا ھەبوونا پەکەکێ ل دەڤەرێ نێزیکێ 60% ژ گەشتیارێن ئاڤا مارک کێم بووینە و دخوازن کو پەکەکە ل وان دەڤەران نەمینن داکو ئەو بکارن پێشوازیا گەشتیاران بکەن ، بەلێ سەرەرای ھەموو مەترسیان ژی رۆژانە ب تایبەتی رۆژانێن ھەینی زێدەتری سێ ھزار گەشتیاران سەرەدانێ بو دکەن.
ئەمیر رێکانی خودانێ ئێک ژ خوارنگەھێن ئاڤا مارک دیارکر بۆ ئەڤرۆ نیوز گۆت: ( رێژەیا گەشتیار و وەلاتیان بو دەڤەرا رێکان و ئاڤا مارک نێزیکێ 60% کێم بوویە ، بێگومان ئەگەرا سەرەکی ژی دزڤریت بو زێدەتر بومەبارانکرنا سوپا و فروکێن تورکی بو دەڤەرێ ژبەرکو پەکەکە ل نێزیک ئاڤا مارک ھەنە ، بەلێ ئەگەر پەکەکە لوان جھان دویر کەفتبانە ئەز باوەرم کو دا رێژەیا گەشتیاران زێدەتر بیت )
زێدەتر گۆت: ( نھا مە چەند گورانکاریەکێن نوو ل ھاڤینگەھا ئاڤا مارک کرینە و چەندین خارنگەە و بازارێن نوو ھاتینە چێکرن و ھێن ڤەحەویان و کەپر ھاتینە چێکرن بو خێزانان ، کو سەر و سیمایەکێ وان دایە دەڤەرێ ، دیسان رۆژانێن بێھنڤەدان و ھەینی و ئێڤاریان خەلکەکێ زور قەستا دەڤەری َدکەت و شەڤ و رۆژ ھاڤینگەھا ئاڤا مارک یا ڤەکریە)
ھەرمان عەلی وەلاتیەکێ دەڤەرێ یە ددەتن دیارکرن کو ئەگەر حکومەت خزمەتگوزاریان ل ئاڤا مارک درۆست بکەت ، دێ رێژەیا گەشتیاران ب رەنگەکێ زور بەفرەە زێدەبن و گۆت ژی: (پرانیا ئەو گەشتیارێن بیانیێن کود ھێنە دەڤەرێ گەشتیارێن عیراقێ نە کو ل باشوور ھاتینە ، و دیسان ھژمارەکا دن ژی خەلکێ پارێزگەھێن ھەرێمێ نە ب تایبەتی ھەولێر و سلێمانی ، بەلێ نەبوونا خزمەتگوزاریێن مینا ئاڤ و کارەب و ھێلا پەیوەندیان چەندین ئاستەنگ بو وەلاتیان و گەشتیاران درۆست کرینە)
ئاڤا مارک کو ھەردوو رووبارێن ئاڤا شین و ئاڤا مارک پێکڤە گرێددەت ب دوراتیا 30کم دکەڤیتە باکوورێ رۆژھەلاتێ ناحیا شێلادزێ یا سەر ب قەزا ئامێدیێ.
