ئه‌مريكا پشته‌ڤانيا خوه يا ته‌مام بۆ خوه‌نيشانده‌رێن ئيرانێ دياركر
ئه‌ڤرۆ نيوز:
وه‌زاره‌تا ژ ده‌رڤه يا ئه‌مريكا پشته‌ڤانيا وه‌لاتێ خوه بۆ خوه‌نيشاندانێن ئيرانێ ل دژى حوكمه‌تێ راگه‌هاندن و ده‌سته‌سه‌ركرنا خوه‌نيشانده‌ران ئيدانه دكه‌ت.
هيزه‌ر ناوێرت، ئاخفتنكه‌رێ ب ناڤێ وه‌زاره‌تا ژ ده‌رڤه يا ئه‌مريكا د به‌ياننامه‌كێ دا داخواز ژ وه‌لاتێن جيهانێ كر كو پشته‌ڤانيێ ل خواستێن ده‌سپێكى يێن خه‌لكێ ئيرانێ بكه‌ت و دبێژيت: “رێبه‌رێن ئيرانێ ئه‌و وه‌لات يێ لاواز كرى، هنارتيێ ئيرانێ يێ ئێكانه ژى شه‌ر و نه‌ئاراميه”.
ئاخفتنكه‌رێ ب ناڤێ وه‌زاره‌تا ژ ده‌رڤه يا ئه‌مريكا پشته‌ڤانيا ته‌مام يا وه‌لاتێ خوه بۆ خوه‌نيشانده‌ران ل دژى حوكمه‌تا ئيرانێ راگه‌هاند و گۆت: “ب تنێ خه‌لكێ ئيرانێ زه‌ره‌رمه‌ندێ سياسه‌تا ده‌سته‌لاتدارێن ئيرانێ يه”.
چه‌ند رۆژه‌كه خوه‌نيشاندان ل ژماره‌كا باژێرێن ئيرانێ و رۆژهه‌لاتێ كوردستانێ ل دژى حوكمه‌تا ئيرانێ ده‌سپێكرين، ل هنده‌ك باژێران درووشمێ “مرن بۆ رۆحانى و رێبه‌رێ كۆمارى” ژ لايێ خوه‌نيشانده‌ران هاتيه بلندكرن. خوه‌نيشانده‌ر عه‌لى خامنه‌يى ب دكتاتۆر ب ناڤ دبه‌ن، هه‌ر ديسا ده‌ستێوه‌ردانێن ئيرانێ د وه‌لاتێن عه‌ره‌بى دا شه‌رمزار دكه‌ن.
ده‌سپێكا خوه نيشاندانێن وه‌لا وه‌لاتى ل رۆژا پێنجشه‌مبى 28ى ڤێ هه‌يڤێ ل دژى بێكارى و هه‌ژارى و گرانيا بهايان ل باژێرێ مه‌شهه‌د ده‌سپێكر، پاشان ژى ته‌هران وه‌كو مه‌زنترين باژێرێ دويێ ل وى وه‌لاتى. پاشان ژى به‌رفره‌هـ بوون و هه‌ر ئێك ژ باژێرێن رشت، سارى، قوم، ته‌برێز، ئورميێ، هه‌مه‌ندان، خرم ئاباد، خوراسان و قوجانى ڤه‌گرتن.
پشتى به‌رفره‌هبوونا خوه‌نيشاندانان ل باژارێن رۆژهه‌لاتێ كوردستانێ ژى ڤه‌گرت، خه‌لكێ كرمانشان و خوره‌مئاوا ل دژى ده‌سته‌لاتدارێن ئيرانێ هاتنه سه‌ر جاددان و چه‌ندين درووشمێن وه‌كو “يان مرن يان ئازادى و مرن بۆ دكتاتۆرى” ب ده‌نگه‌كێ بلند د گۆترن، هه‌ر ژ ئه‌نجامێ وێ چه‌ندێ ئالۆزى د ناڤبه‌را خوه‌نيشانده‌ران و هێزێن ناڤخۆى دا دروست بوون.
