ب ڤیدیو – جوتیاره‌ك تڤرێن قه‌بارێ مه‌زن به‌رهه‌م دئینیت
ئه‌ڤرۆ نیوز، نه‌وزاد هلۆرى
جوتیاره‌كێ گوندێ بالندا یا سه‌ر ب ده‌ڤه‌را بارزان ڤه تڤرێن جیاواز به‌رهه‌م دئینیت ، وه‌كو ئه‌و دده‌تن دیاركرن كو تڤرێن وى سه‌نگا وان ژ پێنج كیلۆیان دبۆریت.
عه‌بدولجه‌بار بالندى بۆ ئه‌ڤرۆ نیوز گۆت” ده‌مێ چه‌ند سالایه ئه‌ز چاندنێ دكه‌م ژ داروبارى و كه‌سكاتيێ وئه‌ڤه دو سێ ساله‌كه ئه‌ز جۆره‌كێ تڤران به‌رهه‌م دئینم كو ئه‌و ژى تڤرێن سپى و شرینن و قه‌باره و سه‌نگا وان گه‌له‌ك مه‌زن دبیت و من تڤرێن هه‌تا پێنج كیلۆ و نیڤ ژى يێن هه‌لكێشاین”.
عه‌بدولجه‌بارى زێده‌تر گۆت” ژبلى كو ئه‌ڤ جۆره تڤره دمه‌زنن، دهه‌مان ده‌م دا شێوه‌یێن جیاواز ژى يێن هه‌ين، بۆ نموونه تڤر دناڤ دا هه‌بوویه وه‌كو مریشكێ بوویه و هه‌بوویه ژى وه‌كو ده‌ست و تبلێن مرۆڤى بوویه وهنده‌ك ژى نیڤ میترێ د درێژن و توفكێ ڤان تڤران من ژ گوندێ يێ په‌یداكرى و هه‌ر سال ئه‌ز توفكێ وان دهه‌لگرم و دووباره دچینم ڤه”.
ئاریشا جوتیارێ ناڤبرى ئه‌وه كو ژبه‌ر مه‌زناهیا قه‌بارێ تڤرێن وى، ل بازارى ناهێنه فروتن و نه‌چاردبیت كو ب دیارى بده‌ت كه‌سوكار و هه‌ڤال و گوندى و ده‌روبه‌رێن خوه ، ل دۆر ڤێ چه‌ندێ دبێژيت” هه‌تا نها من چو تڤرێن خوه نه‌فروتینه ژ به‌ركو قه‌بارێ وان گه‌له‌ك يێ مه‌زنه و كه‌س زوو ب زوو ناكریت و نه‌كرینا وان ژلایێ خه‌لكى ڤه دزڤریت بۆ وێ یه‌كێ كو وان پێزانين ل سه‌ر نینن كا چه‌ند دخوه‌ش و شرینن و ژ وان ڤه یێن پیربووين”.
