ب ڤیدیۆ- چا‌وانیا چێكرن و گرتنا ماسیان ب بێڤان
ئه‌ڤرۆ نیوز، نه‌وزاد هلۆرى:
دكه‌ڤن دا ژبه‌ر نه‌بوونا تۆرا بۆ گرتنا ماسیان ، (بێڤ) ژلایێ وه‌لاتیان ڤه دهاتنه بكارئینان ، هه‌رچه‌نده نها چه‌ندین رێیێن گرتنا ماسیان ده‌ركه‌فتینه ، به‌لێ هێشتا بێڤ ل هنده‌ك ده‌ڤه‌ران بۆ گرتنا ماسیان دهێته بكارئینان.
ئازاد حه‌جى، ئێكه ژ ماسیگرێن كومه‌لگه‌ها سیریێ كو مژوولێ چێكرنا بێڤان بوو ، بۆ ئه‌ڤرۆ نیوز گۆت: (ئه‌ڤرۆ نێزیكێ 25 كه‌سان ب زوباره مه ده‌ست ب چێكرنا بێڤان كریه و ب شێوازێ نوره ئه‌م دچينه به‌ر بێڤان و هه‌ركه و ب شانسێ خوه ماسیان دگریت، هه‌یه دێ سێ كیلۆیان دگریت و هه‌یه ژى دێ هه‌تا 10 كیلۆیان د ئێك رۆژ دا گریت، بێڤ ب شێوازه‌كێ دهێنه چێكرن كو ده‌ستپێكێ دێ به‌را رێزكه‌ن و پاشى كوله‌ك و ده‌راڤان بۆ چێكه‌ن).
سوبحى نیعمه‌ت، ماسیگره‌كێ دى یه بۆ ئه‌ڤرۆ نیوز گۆت: (بێڤ ده‌ستپێكا وه‌رزێ هاڤینێ دهێنه چێكرن و پاشى هه‌تا دوماهیا پایزێ دمینن، ئه‌و ماسییێن كو ده‌ردورا بێڤێ هاتنوچوونێ دكه‌ن ژبه‌ر نه‌مانا چو رێیان نه‌چار دبن بكه‌ڤنه د بێڤێ دا).
زیاد نه‌سروللا، ب هه‌مان شێوه ئه‌و ژى ماسیگره‌كێ ده‌ڤه‌رێ یه، بو ئه‌ڤرۆ نیوز دبێژیت: (بێڤ رێیه‌كا كه‌لتورى یا گرتنا ماسیانه، به‌لێ ئه‌م ژى وه‌كو گه‌نج ژ باب و باپيران فێربوینه ودبه‌رنامێ مه دايه كو هه‌شت بێڤان درۆست بكه‌ین و ب ڤێ یه‌كێ دێ كاره‌كێ باش بۆ گرتنا ماسیان هێته‌كرن).
ب گۆوره‌ى ئاخڤتنێن وان، بێڤ ل جهێن ته‌نگ و سیپه‌ل دهێته چێكرن و ب چو شێوه‌ى رێ ب ده‌ربازبوونا ماسیان ناهێته‌دان و ماسیگر ب شێوێ نوبه‌ت و سرا زێره‌ڤانیێ ل بێڤان دكه‌ن ،و بێڤ ب خوه ژى پێكدهێت ژ حه‌وزه‌كا سێكوشه و تێدا چه‌ند ده‌راڤ دهێنه چێكرن و ماسى ب تنێ ب رێیا وان ده‌راڤان دشێن هاتنوچوونێ بكه‌ن و هه‌رده‌مێ نێزیكێ ده‌راڤێ بوون دكه‌ڤنه دناڤا بێڤێ دا.
