ب ڤیدیۆ: ھاڤینگەھا گەلی قەرەبوویا دەڤەرا نێروەورێکانە بۆ گەشتوگۆزارێ
ئەڤرۆ نیوز، نەوزاد ھلۆری:
پشتی کو ھاڤینگەھا گەلی ل سنورێ ناحیا شێلادزێ ل گەلێ بالندا و سەر رووبارێ ئاڤا شین ھاتیە چێکرن ، وەلاتی و گەشتیار وەکو قەرەبویەک بو دەڤەرا نێروەورێکان و جھێن گەشتوگۆزارێن وێ قەست دکەنێ داکو دویر بن ژ مەترسیا بوردومانا فرۆکێن تورکیا.
ئیبراھیم رەمەزان ، خودانێ ھاڤینگەھا گەلی دایە دیارکرن کو ژبلی گەشتیار و مێھڤانێن دەڤەرێ و پارێزگەھا دھۆکێ، بەشەکێ زور یێ گەشتیارێن وان ل باشوور و ناڤەراستا عیراقێ و سلێمانی و ھەولێر دھێن و بو ئەڤرۆ نیوز گۆت: (ل ھاڤینگەھا گەلی جھەکێ تایبەت بو خێزان و گەشتیار و مێھڤانان ھاتیە چێکرن و دیسان وەلاتی دکارن داوەت و شەھیان و نیشانی و ئاھەنگێن تایبەتێن خێزانی ئەنجام بدەن ، و ھەموو جورە تشتەک ژی ل بەر دەستە مینا خوارنگەە ، کافیتیریا ، بازار ھەتا خوە چایا لسەر پەلان ژی دھێتە چێکرن).
زێدەتر گۆت: (پێشر ھەموو مێھڤان و گەشتیار و وەلاتیان قەستا دەڤەرا نێروەورێکان و جھێن گەشتوگوزاریێن وێ دەڤەرێ دکر بەلێ پشتی کو مەترسی لسەر ژیانا وان درۆست بوی و چەند کەس ھاتینە شەھیدکرن دنھادا ھژمارەکا زور یا گەشتیار و وەلاتیان قەستا ھاڤینگەھا گەلی دکەن و رۆژانێن خوەیێن رەمەزانێ دبورینن و دەمەکێ خوش لسەر رووبارێ شین دبەن و چونا د ناڤ ھاڤینگەھا گەلی بێ بەرامبەرە).
گەشتیار و وەلاتیەکێ دەڤەرێ بناڤێ حسێن جاسم ل بارا سالوخەتێن ھاڤینگەھا گەلی بو ئەڤرۆ نیوز گۆت: (ھاڤینگەھا گەلی دناڤبەرا دوو چیایێن مەزن و لسەر رووبارێ ئاڤا شین و ل جھەکێ خوش و گونجای ھاتیە چێکرن کو ب چوو شێوەیان مەترسیا بوردومانا فروکێن تورکیا لسەر نینە و ئەم دخوازین کو ئێدی گەشتیار و وەلاتی قەستا جھێن مەترسیێن بوردومانێن فروکێن تورکیا نەکەن و ھەر ل نێزیک بمینن مینا ھاڤینگەھا گەلی کو ئێکە ژجھێن خوش و سترایجی و قەرەبالغێن دەڤەرێ).