ب ڤیدیۆ – 36 ساله خێزانه‌كا شێلادزێ نانێ قه‌یسى درۆست دكه‌ت
ئه‌ڤرۆ نیوز، نه‌وزاد هلۆرى:
خێزانه‌كا ناحیا شێلادزێ یا سه‌ر ب قه‌زا ئامێدیێ ئه‌ڤه 36 ساله نانێ قه‌یسى ب حلیكێن زه‌ر و سور دمالا خوه دا درۆست دكه‌ت و ل بازارێن ده‌ڤه‌رێ دفرۆشيت ، نانێ قه‌یسیا شێلادزێ ناڤ و ده‌نگیه‌كا تایبه‌ت هه‌یه و خه‌لكى داخوازى هه‌نه.
ملله‌ت عارف بۆ ئه‌ڤرۆ نیوز گۆت: (ئه‌ڤه 36 ساله پشتى كو ئه‌م ل چه‌لێ زڤرینه شێلادزێ هه‌تا نها خێزانا مه حلیكێن زه‌ر و سور دكه‌ت نانێ قه‌یسى و ل بازارێن ده‌ڤه‌رێ دفرۆشین، و نوكه خه‌لكى زۆر داخوازى ل سه‌ر نانێ قه‌یسى هه‌یه ژبه‌ركو قه‌یسیه‌كا خومالى یه و ب ده‌ست دهێته چێكرن).
زێده‌تر گۆت: (ل ده‌ستپێكێ دێ حلیكا ژ بیستانى ئینین ، پاشى دێ شوین و ل سه‌ر ئاگرى دانین هه‌تاكو باش دكه‌لیت ، پاشى دێ ل سه‌فینكى كه‌ین دا نشا وێ بچیته خوارێ و به‌رگ ژێ بهێنه لێگرتن، پاشى دێ نایلونه‌كێ ته‌نك و رۆهن ئینین و روونى یان زه‌یتێ ل سه‌ر نایلونى دكه‌ین داكو خوه ل نشا حلیكا نه‌ده‌ت، پاشى دێ نشێ ل سه‌ر نایلونى به‌لاڤكه‌ین و هێلینه ل سه‌ر نایلونى بۆ ده‌مێ دو ده‌مژمێر هه‌تا سێ ده‌مژمێران ، پاشى دێ راكه‌ین و د كارتونان دا دانینه د به‌فرگرێ دا هه‌تاكو خه‌لك دهێت دكریت، یان ئه‌م دبه‌ینه بازارى و نوكه كیلۆ ب پێنج هزار دیناران دهێته فرۆتن).
ناڤبرى دیاركر ژى كو سێ جۆرێن نانێ قه‌یسى ل شێلادزێ ژلایێ وانڤه دهێنه چێكرن و گۆت: (نانێ قه‌یسى ب حلیكا سور ، نانێ قه‌یسى ب حليكا زه‌ر و نانێ قه‌یسى ب تێكه‌لكرنا هه‌ردو حلیكێن سور و زه‌ر و تاما نانێ قه‌یسى ب گۆره‌ى داخوازیێ یه و هه‌یه دخوازن یا شرین بیت و هه‌نه دخوازن یا ترش بیت و هه‌نه دخوازن یا تێكه‌ل بیت، ژبلى مه، چو كه‌سێن دى نانێ قه‌یسى ل شێلادزێ درۆست ناكه‌ن ژبه‌رڤێ چه‌ندێ داخوازى زۆر ل سه‌ر هه‌نه و ئه‌م سالانه زێده‌تر ژ 150 كیلۆیان دفرۆشین).
