ب ھزاران لەشکر و تیمێن تایبەت بۆ رۆژھەلاتێ کوردستانێ ھاتینە ھنارتن
ئەڤرۆ:
پشتی خوەنیشادانێن ل مھابادێ و باژارێن دی یێن رۆژھەلاتێ کوردستانێ ب ھزاران ھێزێن ئێمناھیێ و تیمێن تایبەت بۆ باژارێن مھاباد، سنە و گەلەک باژارێن دی یێن رۆژھەلاتێ کوردستانێ ھاتینە ھنارتن و نھا رەوشەکا نەئاسایی ل رۆژھەلاتێ کوردستانێ ھەیە و ھاتن و چوونا خەلکێ ژی ل ژێر چاڤدێریێ دایە.
شەھریار فەرەجی چاڤدێرێ سیاسی ل رۆژھەلاتێ کوردستانێ بۆ رۆژناما ئەڤرۆ دیار کر کو پشتی خوەنیشادانێن ل مھابادێ و باژارێن دی یێن رۆژھەلاتێ کوردستانێ شاندەکێ سەربازی ل تەھرانێ سەرەدانا باژارێ سنێ یێ رۆژھەلاتێ کوردستانێ کریە و ل گەل بەرپرسێن سەربازی یێن وێ پارێزگەھێ کۆمبوونەک دروست کرینە و بریار ھاتیە دان کو ب ھزاران سەرباز و تیمێن تایبەت ل دەڤەرێن دی یێن ئیرانێ بۆ رۆژھەلاتێ کوردستانێ بھێنە رەوانە کرن و دوھی ب ھزاران سەرباز بۆ باژارێن مھاباد، سنە، ئورمیە، سەقز و بانە ھانە ھنارتن و گۆت: (ھەرچەندە ھەتا نھا بەرپرسێن ئیرانێ ب فەرمی نەگۆتینە کو رەوشەکا نەئاسایی ل رۆژھەلاتێ کوردستانێ ھاتیە راگەھاندن، لێ د پراکتیکێ دا رەوشەکا نەئاسایی ھاتیە راگەھاندن و نھا سەرباز و تیمێن تایبەت ل ھەموو ناڤەندێن گرنگ یێن باژارێن رۆژھەلاتێ کوردستانێ جێگر بووینە و ناھێلن خەلک چو کۆمبوونەکێ بکەن).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو تیمێن تایبەت یێن کو بۆ باژارێن رۆژھەلاتێ کوردستانێ ھاتینە ھنارتن ب رەنگێن جودا جودا چاڤدێریا خەلکێ دکەن و ناھێلن چو کۆمبوونێن جەماوەری دروست ببن، ھەروەسا ئەو نھا چاڤدێریا نەخوشخانان ژی دکەن دا بزانن کا کێ د روودانێن رۆژێن بۆری دا بریندار بوویە دا گەفان ل مالباتێن وان بکەن و وان بترسینن، چونکو مەرەما سەرەکی یا ھاتنا ڤێ ھێزێن چاڤترساندنا خەلکێ یە وگۆت: (ل ئالیێ دی دەزگەھێ ھەوالگێریا ئیرانێ ب نھینی سەرەدانا موختارێن تاخێ باژاران دکەن و ژ وان دخوازن کو ب باشی چاڤدێریا ھەر بزاڤەکا خەلکی بکەن و نابیت چو خوەنیشادان بھێنە کرن، و گەفا وێ یەکێ ژ موختاران کرینە کو ھەکە ئەو ب ئەرکێ خوە نەرابن دێ ژ کاری ھێنە دوورخستن و دێ ھێنە سزا دان و ژ بەر ھندێ ژی مرۆڤ دشێت بێژیت کو نھا شەرەکێ پر ئالی ل رۆژھەلاتێ کوردستانێ برێڤە دچیت و رەوشەکا گەلەک خراب ھەیە).
ل ئالیێ دی وەزارەتا ناڤخوە یا ئیرانێ ژی د داخۆیانیەکێ دا دیار کریە کو روودانێن ڤێ دووماھیێ ل مھابادێ و باژارێن دی یێن رۆژھەلاتێ کوردستانێ ب پشتەڤانیا سعوودیێ ھاتیە کرن و سعوودیە دخوازیت رەوشا ناڤخوەیی یا ئیرانێ ئالۆز بکەت و ژ بەر ھندێ ژی ئەو ئالۆزی روو داینە، لێ مە شیایە ئەم کۆنترۆلا بارودوخی بکەین و دێ کەسێن تاوانبار ھێنە سزادان و چو کەسەک نەشێت ئارامیا وەلاتێ مە تێک بدەت.
ل ئالیێ دی ھاتە زانین کو شەڤا بۆری ل باژارێن سەقز و بانە ب ھزاران لاوێن کورد خوەنیشادانەک ساز کرن و داخواز ژ ئیرانێ کرن کو سەرەدەریا خوە ل گەل کوردان بدەتە گوھۆرین، چونکو ب زۆلم و زۆرداریێ چو دەستھەلاتەک نەشێت جڤاکی برێڤە ببەت و کورد ژی ئێدی ناخوازن ھەر رۆژ د بن گەفا دەستھەلاتا نھا یا ئیرانێ دا بژین، ھێزێن ئێمناھیێ ژی ھێرشی خوەنیشادەران کرینە و گەلەک کەس بریندار بووینە و ھەتا نھا ژی چارەنڤیسێ کەسێن بریندار و یێن کو ھاتینە دەستەسەر کرن ژی دیار نینە.
