تارق گەردی: پرۆژە قانوونا ھەرسێ سەرۆکاتیێن عیراقێ ژ ھەرێمێ ناگریت
ئەڤرۆ نیوز:
جێگرێ سەرۆکێ فڕاکسیۆنا پارتی دیموکراتی کوردستان ل پەرلەمانێ عیراقێ راگەھاند، ئەو پڕۆژە قانوونا ھاتیە بەرھەڤکرن و تێدا بەحسێ ھەلبژارتنا ھەرسێ سەرۆکایەتیێن عیراقێ دکەت ب چو شێوەیەکی ھەرێما کوردستانێ ڤەناگریت و دیارکر، ھەرێما کوردستانێ یا پێگیرنابیت ب وێ قانوونێ و دستووری ئەو دەستھەلات یێن داینە ھەرێمێ کا کیش قانوونێ بجھبینیت.
دکتۆر تارق گەردی، جێگرێ سەرۆکێ فڕاکسیۆنا پارتی دیموکراتی کوردستان ل پەرلەمانێ عیراقێ بۆ رۆژناما ئەڤرۆ گوت” ئەو پڕۆژە قانوونا ژلایێ لیژنا قانوونی ل پەرلەمانێ عیراقێ ڤە ھاتیە بەرھەڤکرن و تێدا ئاماژە ب وێ چەندێ دکەت کو نابیت ھەرسێ سەرۆکێن کۆمار و وەزیران و پەرلەمانێ عیراقێ زێدەتری دو خولان خوە بۆ ڤان پۆستان ھەلبژێرن، چو پەیوەندی ب ھەرێما کوردستانێ ڤە نینە”.
تارق گەردی ئاشکراکر ژی” ئەو پرۆژە قانوونە دھندەک خالاندا بەروڤاژی دستوورێ عیراقێ ب خوەیە، چونکی مادێ ٧٢ ژ دستوورێ عیراقێ دیار دکەت کو تنێ سەرۆک کۆمارێ عیراقێ دو خولان زێدەتر نەشێت خوە بەربژارکەت، بەلێ چو ئاماژەیەک ب سەرۆک وەزیران و سەرۆکێ پەرلەمانی نەکریە، ھەکە بھێت و ئەڤ پڕۆژە قانوونە بھێتە پەسەندکرن و ل عیراقێ بھێتە بجھئینان ژی، بێگومان ل ھەرێما کوردستانێ ناھێتە بجھئینان و ھەرێم یا پێگیرنابیت ب وێ قانوونێ، ژ بەر کو مادێ ١٠ ژ دستوورێ عیراقێ ئەو قانوون دیارکرینە یێن سەرانسەری بن و ھەرێمێ ڤەگریت، بەلێ ئەڤە قانوونەکا ئاساییە و ھێشتا پڕۆژەیەکە ھاتیە بەرھەڤکرن و ھژمارەکا پەرلەمانتاران یێ بەرھەڤکری و نەھاتیە پەرلەمانی”.
جێگرێ سەرۆکێ فراکسیۆنا پارتی ل پەرلەمانێ عیراقێ دیارکر” پەیوەندیێن ھەرێما کوردستانێ و عیراقێ ھێشتا وەک بەرێ ماینە و چو ژڤان نینن بۆ سەرەدانا شاندێ ھەرێما کوردستانێ بۆ بەغدا، ھەر چەندە بڕیاربوو شاندێ ھەرێما کوردستانێ بۆ دانوستاندنان ل سەر پرسێن ھەلاویستی سەرەدانا بەغدا بکەت، لێ دەمێ سەرەدانێ یێ یار نینە و نزا ئەو سەرەدان دێ ھێتەکرن یان نە، مە وەک فڕاکسیۆنا پارتی و ھەموو فڕاکسیۆنێن دی یێن کوردی پشتەڤانیا خوە بۆ پڕۆژێ چاکسازیا حەیدەر عەبادی سەرۆک وەزیرێن عیراقێ نیشاندایە ب مەرجەکی ئەو چاکسازی ھەموو بیاڤان ڤەگریت و مافێَن کورد و پێکھاتەیێن دی بھێتە پاراستن، ل ڕۆژێن بۆری حەیدەر عەبادی سەرۆک وەزیرێن عیراقێ ل گەل سەرۆکێن فڕاکسیۆنێن کوردستانی کومبوو و ب ھووری بەحسێ پڕۆژێ خوە یێ چاکسازیێ کر، بەلێ چو دانوستاندن ل دۆر ھەرێما کوردستانێ نەھاتینە کرن و تنێ بەحسێ چاکسازیێ و چاوانیا ئەنجامدانا ڤێ پڕۆسێ ھاتەکرن، بۆمە ژی یا گرنگە ئەو تەوافوقا ھاتیەکرن بھێتە پاراستن و پێنگاڤێن عەبادی بەرۆڤاژی دستووری نەبن”.
