تالبيان پشته‌ڤانيا خوه بۆ داعش دياركر
ئه‌ڤرۆ نيوز:
د به‌ياننامه‌كێ دا كو ب هه‌لكه‌فتا جه‌ژنا قوربان ل جيهانا ئيسلامى هاتيه به‌لاڤكرن، تێدا بزاڤا تاليبان پشته‌ڤانيا خوه بۆ ده‌وله‌تا ئيسلامى ب عيراق و شامێ (داعش) دياركر.
ئه‌ڤ به‌يانناما وان د ده‌مه‌كى دايه كو ده‌وله‌تا ئيسلامى شه‌ره‌كێ دژوار ل گه‌ل گه‌له‌ك ژ وان لايه‌نان كريه ئه‌وێن ژ رێكخستيا قاعيده ڤه‌بووين، به‌لێ تالبيان يا كو ل سالا 1997 ژ پاكستانێ جودا بووى پشته‌ڤانيا خوه بۆ داعش دياركر.
تاليبان هنده‌ك به‌ياننامه به‌لاڤكرينه كو ئيمزايا سه‌رۆكێ بزاڤا تاليبان، مه‌ولانا فه‌زلوللا، ل سه‌ره ب رێيا ئاخفتنكه‌رێ خوه يێ فه‌رمى به‌لاڤكرينه.
سه‌رۆكێ بزاڤا تاليبان د ڤێ به‌ياننامێ دا گۆتيه: “شانازيێ ب سه‌ركه‌فتنێن هه‌وه ل سه‌ر دوژمنى دكه‌ين، د خۆشى و نه‌خۆشيان دا ل گه‌ل هه‌وه‌ينه”.
دياركريه ژى كو ل ڤان رۆژان ل سه‌ر وان پێدڤيه د بهێن فره‌هـ بن، ب به‌هانه‌يا وێ چه‌ندێ كو دوژمنێن وان هه‌موويان يا خوه كريه ئێك و يێ به‌ر ب خه‌لافه‌تا وان ڤه دچن.
ئاماژه ب وێ چه‌ندێ ژى كريه كو جيهانا ئيسلامى دێ پشته‌ڤانێ وان بيت و ل گۆره‌ى شيانان دێ هاريكاريا ده‌وله‌تا ئيسلامى كه‌ت.
ده‌وله‌تا ئيسلامى ل عيراق و شامێ (داعش) ئه‌ڤا به‌رى نوكه خه‌لافه‌تا ئيسلامى ل عيراقێ راگه‌هاندى ب سه‌روبه‌رێ خوه و ره‌فتارێن خوه گه‌له‌ك وه‌كو بزاڤا تاليبانه بگره ژ راپێچا خوه ژى ئه‌ڤه ژبلى ئه‌وا ژێده‌رێن ده‌نگوباسان ديار دكه‌ن كو هژماره‌كا ئێكجار زۆرا وه‌لاتيێن وان ده‌ڤه‌ران ل ناڤ رێزێن داعشن.
