تراجیدییا زارۆكه‌كێ سوری بێئۆمێدییا بهزاران كه‌سان دیاردكه‌ت
ئه‌ڤرۆ نیوز: ڤه‌ده‌ر ره‌شاڤایی:
ل كنارێن ده‌ریا ئیجه ل بۆدروم، توركیا چه‌ند وێنه‌ك هاتینه گرتن كو ویژدانیا مرۆڤایه‌تیێ دهه‌ژینن ، د وێنه‌یان دا ته‌رمێ زارۆیه‌كێ كو پێشبینی دهێـه كرن كۆچبه‌ره‌كێ كوردێ رۆژئاڤا كوردستانێ بیت دده‌ستێن جه‌ندرمه‌كێ تورك دا دهێنه دیتن.
ئه‌ڤ زارۆیه وه‌سا دهێـه پێش چاڤ كو یێ نڤستییه ل كنارێن هاڤینگه‌هه‌كا بۆدروم، لێ ل ڤێ جیهانێ جاره‌كا دی نا رابیته ڤه و یاریان بكه‌ت چونكی بوویه قۆربانییه‌كێ دی یێ شه‌ر و قه‌یرانێن رۆژهه‌لاتا ناڤین.
ئه‌ڤ زارۆیه ژ گرۆپه‌كێ 11 كه‌سی یێ كۆچبه‌ران بوو كو بزاڤ دكرن ژ هاڤینگه‌ها بۆدروم رێكا ده‌ریا ئیجه ببرن و بگه‌هنه گزیرتا كۆس یا یونانی لێ به‌له‌ما وان نقۆم دبیت و سه‌رنشینێن وێ گیانێ خوه ژ ده‌ست دده‌ن.
نها ئه‌ڤ وێنه‌یه ل میدیا جیهانی دا ده‌نگ ڤه‌داییه و چاڤه‌رێی كارڤه‌دانێن نوو یێن وه‌لاتێن ئه‌ورۆپی د سه‌ره‌ده‌ریكرنا وان دا لگه‌ل پێلا كۆچبه‌ران دهێـه كرن، كو بهزاران كۆچبه‌ران تۆشی ئاسته‌نگێن مه‌زن دبن د رێیا خوه دا ژ رۆژهه‌لاتا ناڤین بۆ وه‌لاتێن ئه‌ورۆپی.
