تره‌مپ و پۆتن دێ كۆم بن
ئه‌ڤرۆ نيوز، فاتما مزوورى:
مایكل پۆمپیۆ وه‌زیرێ ده‌رڤه یێ ئه‌مریكا دبێژيت كو د هه‌یاما ڤێ حه‌فتیێ دا شێوه‌رمه‌ندێ ئاسایشا نه‌ته‌وه‌یێن ئه‌مریكا دێ سه‌ردانا مۆسكۆیێ كه‌ت و چاڤه‌رێ دهێته كرن د ده‌مه‌كێ نێزيك دا دۆناڵد تره‌مپ سه‌رۆكی ئه‌مریكا و ڤلادیمێر پۆتین سه‌رۆكێ رۆسیا ب هه‌ڤرا كۆم ببن.
پۆمپیۆ د هه‌ڤدیتنه‌كێ دا ژبۆ كه‌نالێ (ئێم ئێس ئێن بی سی) ته‌كه‌ز كر كو “جۆن بۆڵتن” سوبه رۆژا ئێكشه‌مب یان دوسبه‌ی رۆژا دوشه‌مبى دێ سه‌ره‌دانا مۆسكۆ كه‌ت و ب بۆچوونا من د ده‌مه‌كێ نێزیك دا پشتی سه‌ردانێ تره‌مپ و پۆتین دی كۆم بن.
ل دۆر پرسیاره‌كێ كا ئه‌رێ تڕه‌مپ نیه‌تا وێ یه‌كێ هه‌یه د ناڤا ڤێ هاڤینێ دا سه‌ره‌دانا مۆسكۆ بكه‌ت؟ پۆمپیۆ ئاماژه ب وێ یه‌كێ كر كو چو پێزانین ل سه‌ر هوربینیێن گه‌شتا سه‌رۆكی نینن.
سێشه‌مبی یا ده‌رباس بووی ميدیایێن رۆسیا ل كرملین ڤه‌گوهاست كو چو پلانه‌ك نینه ژبۆ كۆمبوونێن گۆپیتكێ یا د ناڤبه‌را تره‌مپ و پۆتین دا به‌ری گۆپیتكا هه‌ڤپه‌یمانیا باكوورێ ئه‌تڵه‌سی(ناتۆ) كو بڕیاره ل 11 و 12 تيرمه‌ها بهێت دا ل برۆكسل بهێته سازكرن و تره‌مپ تێدا به‌رهه‌ڤ ببيت.
د ده‌مێن ده‌رباز بووی دا هه‌ر ئێك ژ تره‌مپ و پۆتین دو جار كۆمبووينه و هه‌شت جاران ژی ب ته‌له‌فونێ په‌یوه‌ند ب هه‌ڤدۆ كريه.
