تری و سێڤێن جۆتیارێن دهۆكێ بۆ ده‌رڤه‌ی وه‌لاتی دهێنه هنارتن
دهۆك، له‌زگین جوقی:
رێڤه‌به‌رێ گشتی یێ چاندنێ ل پارێزگه‌ها دهۆكێ دیار كر، به‌رهه‌مێ تری و سێڤێن جۆتیارێن پارێزگه‌ها دهۆكێ بۆ ده‌رڤه‌ی وه‌لاتی دهێنه هنارتن و دبێژیت: به‌رده‌وام كار بۆ په‌یداكرنا بازاری بۆ به‌رهه‌مێ خۆمالی یێ جۆتیاران دهێته كرن.
ئه‌حمه‌د جه‌میل، رێڤه‌به‌رێ گشتی یێ چاندنێ ل پارێزگه‌ها دهۆكێ خویا ژی كر، ئێك ژ پلان و به‌رنامێ حكومه‌تا هه‌ریما كوردستانێ ئه‌وه بازاری بۆ به‌رهه‌مێ خۆمالی یێ جۆتیاران په‌یدا بكه‌ت و گۆت: “نوكه كار ل گه‌ل نڤییسنگه‌ها سه‌رۆكێ حكومه‌تا هه‌رێما كوردستانێ یێ دهێته كرن به‌رهه‌مێ جۆتیاران بۆ ده‌رڤه‌ی وه‌لاتی بهێته هنارتن، ب تایبه‌تی تری و سێڤێن جۆتیارێن پارێزگه‌ها دهۆكێ و دبیت هنار ژی بكه‌ڤته د پلانێ دا وه‌كو ده‌ڤه‌رێن دی یێن هه‌رێما كوردستانێ”.
