تلفریکەک دێ ژ سەرسنکێ چیتە چیایێ گارەی
ئه‌ڤرۆ نيوز:
بەرپرسێ راگەھاندنا گەشت و گوزاری ل قەزا ئامێدیێ بۆ ئەڤرۆ دیار کر، مەزنترین پرۆژێ گەشتیاری دێ ل قەزا ئامێدیێ ھێتە چێکرن و ل ڤان نێزیکان دێ دەست ب کاری ھێتە کرن.
حەمید محەمەد سالح بەرپرسێ راگەھاندنا رێڤەبەریا گەشت و گوزاری ل ئامێدیێ خویا کر ، ل ڤان نێزیکان دێ دەست ب چێکرنا تلفریکا چیایێ گارە ھێتە کرن و گۆت “ئەڤ پرۆژە ژ دو قووناغان پێک دھێت و ھەر دو قووناغ پێکڤە دھێنە چێکرن و ئەڤە گرنگترین پرۆژێ گوزاری یە دێ ل دەڤەرێ ھێتە چێکرن”.
ناڤبری ئاشکرا کر، کو قووناغا ئێکێ یێ چێکرنا تلفریکێ دێ ل سەرسنکێ ھێتە دەستپێکرن بۆ چیایێ گاروکێ و ل وێرێ دێ کۆمەلگەھەکا گوزاری ھێتە چێکرن، ھەروەسا قووناغا دویێ دێ چیایێ گاروکێ دەست پێ کەت بۆ سەرێ چیایێ گارەی و ل وێرێ ژی دێ کۆمەلگەھەکا گوزاری ھێتە دروستکرن.
ھەروەسا بەربرسێ راگەھاندنا گەشت و گوزاری ل ئامێدیێ دیار کر، کو ئەڤە دێ بیتە مەزنترین پرۆژێ گەشت و گوزاری ل دەڤەرێ و دێ گرنگیەکا زۆر ھەبیت بۆ خەلکێ دەڤەرێ ب گشتی و گۆت “ئەم یێ ل گەل کۆمپانیا بجھئینەر ئاخفتین و ل ڤان نێزیکان دێ دەست بکارێ چێکرنێ ھێتە کرن”.
