ته‌حسین تاهاى بچووك نه‌كه‌ن
به‌یارێ زاویته‌یى
وه‌كو من زانى لقا ئێك یا پارتى دیمۆكراتى كوردستان دێ په‌یكه‌ره‌كى بۆ هونه‌رمه‌ندێ مه‌زن ته‌حسین تاهاى دروست دكه‌ت وه‌كو رێزگرتن بۆ خه‌بات و خزمه‌تا وى بۆ هونه‌رێ كوردى، لێ ده‌مێ مرۆڤ رێزێ ل كه‌سه‌كێ مه‌زن و خودان رێز بگریت، پێدڤیه خواندنه‌كا زانستى بۆ بهێته‌كرن دا بزانیت دێ چاوا رێزێ ل وى كه‌سى بگریت كو همبه‌رى خه‌بات و زه‌حمه‌تا وى بیت. ل گۆره‌ى زانینا من لقا ئێك ل به‌ره په‌یكه‌رێ هونه‌رمه‌ندێ مه‌زن و نه‌مر ته‌حسین تاها ل ناڤا پاركا دلشاد محه‌مه‌د سه‌عید ل تاخێ زركا بدانیت، هه‌ر چاوا بیت جهێ ده‌ستخۆشیێ یه كو لقا پارتى هزر د كاره‌كێ وه‌سا دا كرى، لێ پێدڤیه خواندنه‌كا دى بۆ وى كارێ خوه بكه‌ن، دا بشێن مه‌زناهیا وى هونه‌رمه‌ندى بپارێزن. دانانا په‌یكه‌رێ ته‌حسین تاهاى ل ناڤا پاركا دلشاد محه‌مه‌د سه‌عید ب دیتنا من ژ دو ئالیان ڤه خراب و شاشه: ئێك: بچووكترین كارێ ئه‌ڤ باژیرَه و ئه‌ڤ حوكمه‌ته شیاین بۆ هونه‌رمه‌نده‌كێ مه‌زن یێ وه‌كو دلشاد محه‌مه‌د سه‌عید بكه‌ن، پاركه‌ك ب ناڤێ وى ب ناڤ كریه، هه‌ر چه‌نده خزمه‌تا دلشاد محه‌مه‌د سه‌عید گه‌له‌ك ژ وێ پاركێ مه‌زنتره، پێدڤى ژى ناكه‌ت به‌حسا وى مامۆستایێ مه‌زن بكه‌ین، ژبه‌ركو خزمه‌تا وى یا به‌رچاڤه، بلا ئه‌و پارك بۆ وى ب تنێ بیت و د گه‌ل چو تشتێن دى تێكهه‌ل نه‌كه‌ن، دا ئه‌و رێز هه‌ر بۆ وى بمینیت. دو: دانانا په‌یكه‌رێ ته‌حسین تاهاى د ناڤا وێ پاركێ دا، دێ وى ته‌حسینى بچووك كه‌ت و دێ یێ به‌رزه بیت، ئانكو مه‌ره‌ما په‌یكه‌ر پێ هاتیه چێكرن بجه ناهێت و دێ به‌رزه بیت، ژبه‌ركو ئه‌و كه‌سێن قه‌ستا وێ پاركێ دكه‌ن خه‌لكێ نۆرماله و ره‌نگه كه‌س چو بهاى نه‌ده‌ته وى په‌یكه‌رى. هونه‌رمه‌نده‌كێ مه‌زن یێ وه‌كو ته‌حسین تاها پێدڤیه رێزه‌كا مه‌زن ل خه‌بات و زه‌حمه‌تا وى بهێته گرتن، له‌ورا یا باش ئه‌وه په‌یكه‌رێ وى هونه‌رمه‌ندێ مه‌زن ل جهه‌كێ دیار بهێته دانان كو بشێن وى كه‌سى باشتر بۆ خه‌لكێ خوه و خه‌لكێ بیانى بده‌ینه نیاسین و ده‌ما به‌حسا وى بكه‌ین شانازیێ ببه‌ین كو ئه‌م خودان هونه‌رمه‌نده‌كێ وه‌كو ته‌حسینى ینه. ب دیتنا من پێدڤیه په‌یكه‌رێ ته‌حسین تاهاى ل به‌ر ده‌رگه‌هێ زانكۆیا دهۆكێ یان ژى ب تایبه‌ت ل به‌ر ده‌رگه‌هێ كۆلیژا ئادابێ بهێت دانان دێ گه‌له‌ك باشتر بیت و ب راستى دێ بیته رێزگرتن بۆ وى هونه‌رمه‌ندى، ئه‌و ژى ژ به‌ر هنده‌ك ئه‌گه‌ران، دبیت د پاشه‌رۆژه‌كا نێزیك دا ئه‌و په‌یكه‌ر ببیته ئه‌گه‌ر قوتابیێن زانكۆیا نامه‌یێن ماسته‌ر و دكتورایێ ل سه‌ر ژیان و خه‌بات و هونه‌رێ وى بنڤیسن، یان ژى ده‌مێ كه‌سه‌كێ بیانى ژ رۆژنامه‌ڤان و هونه‌رمه‌ند و تا مامۆستایێن زانكۆیێ ژى ژ وه‌لاته‌كى دهێن و وى په‌یكه‌رى ببینن دێ پرسیار كه‌ن كا ئه‌و كیه، ل وى ده‌مێ مرۆڤ دشێت ب باشترین شێوه به‌حسا خه‌بات و وه‌ستیانا وى بكه‌ت و بیته جهێ شانازیێ بۆ دهۆكێ و بۆ زانكۆیێ و بۆ هونه‌رێ كوردى ژى. ئه‌گه‌ر ئه‌و ژى نه‌هێـه كرن، هه‌ما هه‌ر چ نه‌بیت جهه‌كێ تایبه‌ت ب ناڤێ ته‌حسینى بكه‌ن دیشا دا بهێت پاراستن و ناڤێ وى بمینیت، له‌ورا هیڤیه ژ لقا ئێك و هه‌ر كه‌سێ ب وى كارى رابووى، ته‌حسین تاهاى بچووك نه‌كه‌ن.
