ته‌له‌ڤزيۆنه‌كا ئوسترالى:ل هه‌يڤا داهاتى ئه‌مريكا دێ هێرشێ كه‌ته سه‌ر ئيرانێ
ئه‌ڤرۆنيوز:
راپۆرته‌كا هه‌والگيرى يا نێڤده‌وله‌تى ئاشكرا كر كو ئه‌مريكا يا به‌رهه‌ڤه ل ده‌ستپێكا هه‌يڤا ته‌باخا داهاتى هێرشه‌كا نه‌چاڤه‌رێكرى بكه‌ته سه‌ر بنگه‌هێن له‌شكرى وويستگه‌هێن ئه‌تۆمى يێن ئيرانێ.
ته‌له‌ڤزيۆنا نيشتمانى يا ئوسترالى (ABC) به‌لاڤكر كو ل دووڤ راپۆرتێن ده‌زگه‌هێن هه‌والگيرى، واشنتۆن يا به‌رهه‌ڤه ل ده‌ستپێكا هه‌يڤا ته‌باخا داهاتى هێرشه‌كا نه‌چاڤه‌رێكرى بكه‌ته سه‌ر بنگه‌هێن له‌شكرى وويستگه‌هێن ئه‌تۆمى يێن ئيرانى.
ئاشكراكرنا ناڤه‌رۆكا وێ راپۆرتێ ژى كارڤه‌دانێن جيهانى ل دووڤ خوه ئينان، هه‌ڤده‌م جيمس ماتيس، وه‌زيرێ به‌رگريا ئه‌مريكا ناڤه‌رۆكا وێ راپۆرتێ ره‌تكر.
وێ ته‌له‌ڤزيۆنا ئوسترالى ل سه‌ر زارێ به‌رپرسێن بلند يێ هه‌والگيريا ئوسترالى راگه‌هاند” دۆنالد ترامپ سه‌رۆكێ ئه‌مريكا دبيت يێ به‌رهه‌ڤ بيت هێرشێ بكه‌ته سه‌ر ئيرانێ”.
هه‌روه‌سا به‌لاڤكر” بنگه‌هێ له‌شكرى باين گاب يێ نهێنى ل هه‌رێما باكوورێ ئوستراليا وبنگه‌هێن دى يێن به‌رگريێ ل وى وه‌لاتى دێ رۆله‌كێ بلند دهێرشكرنێ دا ل سه‌ر ئارمانجان بينيت”.
ل دۆر وێ هێرشا به‌حس لێ هاتيه كرن، سه‌رۆك وه‌زيرێن ئوستراليا (مالكۆم تێرنبول) گۆت” ژێده‌رێ راپۆرتا وێ ته‌له‌ڤزيونا ئوسترالى ژ وێ چه‌ندێ هاتيه كو به‌رى چه‌ند رۆژان داخۆيانيێن توند دناڤبه‌را به‌رپرسێن ئه‌مريكى وئيرانى هه‌بوون”.