توركيا ده‌سته‌سه‌ركرنا سه‌ركرده‌كێ په‌كه‌كێ رادگه‌هينيت
ئه‌ڤرۆنيوز:
وه‌زاره‌تا ناڤخوه‌يا توركيا راگه‌هاند، ل نێزيك باژێرێ شه‌رنه‌خێ هيزێن توركى دو كه‌س ده‌سته‌سه‌ركرن كو ئێك ژوان سه‌ركرده‌كێ په‌كه‌كێ يه.
ئاژانسا ئه‌نادۆل يا ده‌نگوباسان يا توركى به‌لاڤكر” ل ئولۆده‌رێ ل نێزيك باژێرێ شه‌رنه‌خێ، هێزێن توركى شيان دو كه‌سان ده‌سته‌سه‌ر بكه‌ن كو ژ وى سنورى بزاڤ دكرن بهێنه دناڤ توركيا دا”.
ئاژانسا ناڤبرى ئاماژه ب راگه‌هاندنه‌كا فه‌رمى يا وه‌زاره‌تا ناڤخوه يا توركى كر كو ئاشكرا دكه‌ت ئێك ژوان هه‌ردو كه‌سێن ده‌سته‌سه‌ركرى ب ناڤێ (مه‌زلووم قۆچان) ويا ناڤداره ب (مه‌زلووم گويى) وه‌كو سه‌ركرده دناڤ په‌كه‌كێ دا ژلايێ وه‌زاره‌تا ناڤخوه‌يا توركيا ڤه دهێته هژمارتن، يێ دى ژى ب ناڤێ ( له‌زگين يارار).
دياركر ژى” هێزێن توركى ئه‌و هه‌ردو كه‌س ب چه‌ك ڤه يێن ده‌سته‌سه‌ركرين كو ئێك ژوان چه‌كێ قه‌ناسێ ل گه‌ل بوو ويێ دى ژى چه‌كه‌كێ جۆرێ (ئێم 16) وئاميرێ بێته‌لێ ژى دگه‌لدا بوو”.
هه‌تا نوكه ده‌زگه‌هێن راگه‌هاندنێ يێن نێزيك ژ په‌كه‌كێ چ رۆهنكرن ل دۆر پێزانينێن وه‌زاره‌تا ناڤخوه‌يا توركيا به‌لاڤكرين، نه‌داينه.
