توركيا ده‌ست ب گرتنا لايه‌نگرێن “په‌كه‌كێ” و “هه‌ده‌پێ” كر
ئه‌ڤرۆ نيوز:
هێزێن ئه‌منى يێن توركيا نێزيكى 600 كه‌س ب تۆمه‌تا تيرۆرێ ده‌سته‌سه‌ركرن كو پتريا وان پشته‌ڤانێن په‌كه‌كێ و هه‌ده‌پێ نه و په‌رله‌مانێ وى وه‌لاتى ژى رۆژا چارشه‌مبى دێ روونشتنه‌كا نه‌ئاسايى ئه‌نجام ده‌ت.
ئۆپه‌راسيۆنێن هێزێن ئه‌منى يێن توركيا بۆ ده‌سته‌سه‌ركرنا رێكخستيێن پارتيا كرێكارێن كوردستانێ “په‌كه‌كه” و پارتيا ديموكراتا گه‌لان “هه‌ده‌په” ل 22 پارێزگه‌هێن وى وه‌لاتى يا به‌رده‌وامه و هه‌تا نوكه 590 كه‌س ده‌سته‌سه‌ركرينه.
رۆژا 24ى تيرمه‌ها 2015ێ، ئۆپه‌راسيۆنان ده‌سپێكر و 288 كه‌س ده‌سته‌سه‌ركرينه و رۆژا ل دووڤدا ژى هه‌تا نوكه 302 كه‌س ده‌سته‌سه‌ركرينه.
حوكمه‌تا توركيا راگه‌هاند: “ئۆپه‌رسيۆن دژى تيرۆرێ نه و ئه‌ندامێن په‌كه‌كێ و داعش دگريت”، به‌لێ هه‌ده‌په رادگه‌هينيت: مه‌ره‌ما توركيا ده‌سته‌سه‌ركرنا ئه‌ندامێن وانه نه‌كو يێن داعش.
بۆ دانوستاندنا ئالۆزيێن ل توركيا ژى هه‌يى، بڕياره رۆژا چارشه‌مبى په‌رله‌مانێ توركيا روونشتنه‌كا نه‌ئاسايى ئه‌نجام بده‌ت و بۆ ڤێ مه‌ره‌مێ ژى ئيمزايا 116 په‌رله‌مانتارێن توركيا كۆم كرينه.
پێشتر سه‌لاحه‌دين ده‌ميرتاش هه‌ڤسه‌رۆكێ هه‌ده‌پێ ژى داخوازا روونشتنا نه‌ئاسايى يا په‌رله‌مانێ توركيا كربوو، ئه‌ڤ روونشتنه د ده‌مه‌كى دايه كو په‌رله‌مانێ توركيا د بهێنڤه‌دانا هاڤينێ دايه.
