توركيا: ھزار کەس ل تورکیا چووینە ناڤ رێزێن داعشێ
ئەڤرۆ:
جێگرێ سەرۆک وەزیرێن تورکیا بۆلەنت ئارنج د داخۆیانیەکێ دا راگەھاند کو تنێ ژ ئورۆپا و وەلاتێن دی یێن جیھانێ خەلک ناچیتە ناڤ داعشێ، بەلکو رێژەکا بەرچاڤ ژ گەنجێن تورکیا چووینە ناڤ رێزێن داعشێ و ل گۆر ئاگاھیێن مە ھەتا نھا ھزار کەس چووینە و چووینا لاوازن بۆ ناڤ رێزێن داعشێ بەردەوام دکەت و گۆت: (ل گۆر ڤەکۆلینێن سازیا ھەوالگێریا مە پرانیا وان گەنجان ھاتینە خاپاندن و ھندەک سۆزێن خەیالی بۆ وان ھاتینە دان و وان ژی بەرێ خوە داینە ناڤ رێزێن داعشێ).
جێگرێ سەرۆک وەزیرێن تورکیا ئەو یەک ژی ئاشکرا کر کو خەمساریا سازیێن دەولەتێ بوویە ئەگەر کو گەنج وەسا بچنە ناڤ داعشێ، چونکو چووینا وان کەسان دێ د پاشەرۆژێ دا مەترسیەکا گەلەک مەزن بۆ تورکیا دروست بکەت و ھەکە ھندەک ژ وان ڤەگەرنە تورکیا ژی بێگومان دێ ئالۆزیێن مەزن بۆ وەلاتێ مە دروست بکەن و گۆت: (مە ب ھەموو رەنگەکێ توندوتیژیێ رەد دکەین و دیارە یێن دچنە ناڤ داعشێ ژی ل سەر بنەمایێ ھشکباوەری و توندوتیژیێ دھێنە پەروەردە کرن و ئەڤە ژی دێ ئالۆزیەکا مەزن بۆ مە دروست کەت و دڤێت مالبات ژی نەھێلن کو زارۆیێن وان بەرێ خوە بدەنە ناڤ وێ رێکخستنێ چونکو وان چو پاشەرۆژەک ل گەل داعشێ نابیت).
بەری نھا چەندین دەزگەھێن راگەھاندنا ئورۆپا ژی دیار کربوون کو ل ئورۆپا رێژەکا بەرچاڤ ژ تورکان بەرێ خوە ددەنە ناڤ رێزێن داعشێ و ھژمارا کەسێن تورک ژ خەلکێن دی یێن کو دچنە ناڤ داعشێ زێدەترە و ھندەک چاڤدێرێن سیاسی ژی شەرێ داعشێ ل گەل کوردان وەک ئەگەرەکێ سەرەکی یێ چووینا تورکان بۆ ناڤ داعشێ ددانە دیار کرن، لێ ھندەک چاڤدێرێن دی یێن سیاسی ژی دیار دکەن کو چووینا ناڤ داعشێ چ پەیوەندیا خوە ب فاکتەرێ نەتەوی نینە، بەلکو یێن ل ژێر کاریگەریا ھزرێن ھشکباوەریێ دانە ل ئورۆپا دچنە ناڤ داعشێ.
