توركیا: پێدڤیە بەغدا 17% ژ بۆدجه‌ى بۆ كوردستانێ ب مەزێخیت
ئەڤرۆنیۆز:
پەیڤدارێ سەرۆكاتیا كومارا توركیا، ئیبراهیم كالن، ئەڤرۆ ئێكشەمبی، راگەهاند توركیا ناخوازیت زیان بگەهنە وەلاتیێن هەرێما كوردستانێ، لەوما مە هنارتنا پەترۆلێ رانەوەستاند وئەم چاڤەڕێ دكەین داهات بچیتە بەغدا وپێدڤیە حوكمەتا عیراقێ 17% ژ بۆدجا گشتی بۆ هەولێرێ بهنێریت.
كالن ددیدارەكێ دا ل گەل كەنالێ NTV یێ توركی ل دووڤ سایتێ بەغدا پۆست گۆت” ل گەل ئەنجامدانا ریفراندۆمێ، مە هندەك پێرابوون ئەنجامدان وەكو راوەستاندنا گەشتێن ئەسمانی وهەلاویستنا پەیوەندیێن دو قولی ومە پرنسیبێ نەگەهاندنا زیانێ ب ئاكنجیێن هەرێمێ پەیرەوكر وهەتا ئەڤرۆ ژی دەرگەهێ ئیبراهیم خەلیل یێ ڤەكریە وبزاڤا بازرگانی یا بەردوامە ب رێیا وی دەرگەهی ژبۆ پێدڤیێن وەلاتیێن هەرێمێ”.
گۆت ژی” مە داخواز كریە دەرگەهێ سنۆری بهێتە رادەستكرن بۆ بەغدا، یان ژی ب شێوەكێ هەڤپشك بهێتە ب رێڤەبرن، هەرچەندە گەلەك بەحس ل سەر وێ چەندێ یا هەی، بەلێ هەكە هەردو لایەن گەهشتنە رێككەفتنێ، دێ ئەڤ دەرگەهە ڤەكری مینیت”.
خویاكر ژی” هەتا نوكە مە هنارتنا پەترۆلێ ب رێیا بۆریێن پەترۆلێ رانەوەستاندیە ول دووڤ دووماهی پێزانینان داهاتی دچیتە بەغدا ژی وپێدڤیە ل سەر بەغدا پشكا 17% ژ بۆدجا عیراقێ بۆ هەولێرێ ب هنێریت ومە ل بەغدا ژی گۆتە وان كو وێ میكانیزمێ بكاربینن”.