تورکمان : ئێدی من باوەری ب ئێکگرتنا عیراقێ نەمایە
ئەڤرۆ نیوز:
سەرۆکێ بزاڤا دیموکراتیا تورکمانی ل کوردستانێ راگەھاند، چو ھیڤی و ئۆمێد د پێکڤەژیانا عیراقێ دا نە ماینە و دڤێت ئەم بڕیارا چارەنڤیسێ خوە وەربگرین.
دداخویانیەکا تایبەت دا، سەرۆکێ بزاڤا دیموکراتیا تورکمانی کەرخی نەجمەدین ئالتی برماخ دبێژیت:ئێدێ من باوەری ب ئێکگرتنا ئاخا عیراقێ نەمایە، ئەڤ باوەریە ب ھەروەیی نەھاتیە، ئەوا ل عیراقێ دھێتە روودان ددەمێ 10 سالێن بۆری دا و ھەتا نوکە، مەزنترین بەلگەیە کو باوەریا ب عیراقەکێ وەک خێڤەتا مەزن بۆ خەکلێ عیراقێ چو راستی ژبۆ نینە، ھەکە ئەم پیچەک بۆ پاشڤە ب زڤڕین بۆ سەردەمێ رژێما سەدام حسێن، کوردستان وەک دەولەتەکا سەربخوە بوویە، چو پەیوەندی ژی ب عیراقێ ڤە نەبوون، بەلێ پشتی نەمانا رژێما سەدام و دەستھەلاتا بەعسیان کوردستانێ پێکڤەژیانا ل گەل عیراقێ ھەلبژارت، و پشکداریا ددەستھەلاتا عیراقا نوودا وەکی دەستپێشخەریەکا نیاز پاکیێ، ب وێ ھیڤی و ئۆمیدا سیستەمێ دیموکراتی یا بەرفرەە ل عیراقێً بھێتە پەیرەوکرن، کو ھەموو خەلکێ عیراقێ تێدا شاد و بەختەوەرببن، بیێ جوداھیا ئۆلی و نەتەوەی و توخم پەرستیێ، و قەرەبووکرنا ھەموو خەلکێ عیراقێ یێ تووشی نەکبەت و زەرەرمەند بووی رژێما بەرێ، بەلێ جھێ داخێ یە یا ھاتیە پێش دەستھەلاتا تائفەگەری و دەستھەلاتا تاک ڕەوی و بڕینا نانێ خەلکی و وەلاتیێن کوردستانێ بوویە، و ھنارتنا ھێزێن داگیرکرنێ بۆ ئاخا کوردستانێ بوویە.
زێدەباری وێ چەندێ ژی کەرخی دیارکر، نوکە پشتی پەیدابوونا چەکدارێن تیرۆرستێن داعشێ و حەشدا شەعبی، ب باوەریا من گەلەک ئەگەرێن دی دێ پەیدا بن کو رێگریێ ل ھەمبەری عیراقەکا ئێکگرتی بکەن و عیراق نەبیتە خیڤەتەک بۆ کومبوونا ھەموو پێکھاتێن عیراقێ لبن سیبەرا وێ خیڤەتێ.
سەبارەت ریفراندۆمێ و دیارکرنا چارەنڤیسێ کوردستانێ، سەرۆکێ بزاڤا دیموکراتی یا تورکمانی ل کوردستانێ گۆت: پێدڤیە ل سەر سەرکرداتیا سیاسی باش بزانیت، مافێ مللەتێ کوردستانێ یە دەولەتا خوە ھەبیت، و نابیت ب چو رەنگان ریفرااندۆم بھێتە پاشخستن و گیروکرن، ھندەک ئالیێن سیاسی ھەنە بەحسێ دەولەتا کوردستانێ ب شێوازەکێ حزباتیێ بەرتنەگ دکەن، بەلێ جەماوەرێ کوردستانێ ب ھەموو پێکھاتێن خوەڤە ل گەل ئاڤاکرنا دەولەتا کوردستانا سەربخوە نە، دڤێت ئەم ڤێ دەلیڤێ ژدەست نەدین بۆ بجھئینانا ئارمانج و ھیڤیێن کوردستانێ، چونکی پشتی ئازادکرنا باژێرێ مووسلێ ئەو ھاوکێشە ھەموو دێ ھێنە گوھۆڕین، ومللەتێ کوردستانێ ھەموو بەرپرس و سەرکردێن سیاسی دێ دانیتە بەر پرسا دیرۆکی.
