تورکیا ب کۆمبوونا ئستەنبولێ دخوازیت رۆلێ ئیرانێ ل سووریێ کێم بکەت
ئەڤرۆ نيوز:
کۆمبوونا تورکیا، فرەنسا، ئەلمانیا و روسیا یا بۆ چارەکرنا قەیرانا سووریێ کو سەرۆک کۆمارێ تورکیا سەرپەرشتیا وێ دکەت بوویە مژارا گەرم یا دەزگەھێن راگەھاندنا ئیرانێ و پرانیا بسپۆرێن سیاسی یێن ئیرانێ ژی دبێژن تورکیا دخوازیت ئیرانێ بکەتە قوربانی دا خوە نێزیکی ئورۆپا بکەت و ژ بەر ھندێ ژی ئیران ب فەرمی بۆ کۆمبوونا ئستەنبولێ نەھاتیە ڤەخواندن و ئەو یەک ژی دڤێت نەھێتە قەبوول کرن.
ئاژانسا مێھر یا ئیرانی دوھی د راپۆرتەکێ دا راگەھاند کو ھەتا نھا کۆمبوونێن ل دۆر پاشەرۆژا سووریێ کو تێدا تورکیا و روسیا پشکدار بووینە ئیران ژی ھەبوویە، لێ ئەڤە جارا ئێکێ یە کو تورکیا دو وەلاتێن ئورۆپا ژی ڤەخواندیە کۆمبوونێ و ئیران نەھاتیە ڤەخواندن و دیارە ئەردۆگان دخوازیت بابەتێ پەنابەرێن سووریێ یێن ل تورکیا وەکو کارتەکا بھێز یا فشارێ ل دژی ئورۆپا بکار بینیت دا وەلاتێن ئورۆپا نەچار بن د بیاڤێ ئابووری دا ھاریکاریا تورکیا بکەن، چونکو نھا رەوشا ئابووری یا تورکیا خرابە و ئەردۆگان ژی پێدڤی ب ھاریکاری و پشتەڤانیا ئەلمانیا و فرەنسایە.
ل ئالیێ دی رۆژناما مللیەت یا تورکیا ژی دیار کر کو ئەردۆگان دخوازیت ب رێیا ئەلمانیا و فرەنسا رەوشا ئابووری یا تورکیا باش بکەت، چونکو ھەکە ھەر دو وەلاتێن ئورۆپی داخوازیێن تورکیا قەبوول نەکەن ئەردۆگان دێ بێژیت وی دەمی ئەم نەچار نینین رێگریێ ل ھاتنا پەنابەران بۆ ئورۆپا بکەین و دێ دەرگەھێ خوە ڤەکەین، ئەو یەک ژی بێگومان دێ مەترسیەکا خوە یا مەزن بۆ ئورۆپا ھەبیت، لێ دیار نینە کا دێ ھەلویستێ ھەر دو وەلاتێن زلھێزێن ئورۆپا ئانکۆ ئەلمانیا و فرەنسا ل دۆر ڤی بابەتی چ بیت، چونکو ڤێ دووماھیێ دەمێ ئەردۆگانی سەرەدانا ئەلمانیا کری گەلەک بزاڤ کرن کو سەرمایەدارێن ئەلمانیا سەرمایە خوە بیننە تورکیا و کار بکەن، لێ ئەلمانیا گرنگی نەدا داخوازیا ئەردۆگانی و ژ بەر ھندێ ژی رەنگە شیرەتکارا ئەلمانیا دیسان ژی بەرسڤەکا وەسا بدەتە ئەردۆگانی و فرەنسا ژی ل گۆر بەرژەوەندیێن خوە ل سووریێ دێ سەرەدەریێ ل گەل رەوشا نوو یا دەڤەرێ کەت.
