تى ئێن تى یه‌ك ل سه‌ر جادا سه‌ره‌كى یا ناحیا كانى ماسێ په‌قی
به‌روارى بالا، زنار تۆڤى:
تى ئێن تى یه‌ك ل سه‌ر جادا سه‌ره‌كى یا د ناڤبه‌را گوندێ ئۆرمه‌داودا و گوندێ ئۆرمانا دا ل سنوورێ ناحیا كانى ماسێ په‌قی و زیانێن مه‌زن گه‌هاندنه جادا سه‌ره‌كى، لێ چو زیانێن گیانى ژێ په‌یدا نه‌بوون و رێڤه‌به‌رێ ناحیا كانى ماسێ ژى دبێژیت: هه‌تا نوكه نه‌هاتیه زانین كانێ كێ ئه‌و تى ئێن تى دانایه وى جهى.
ئه‌لند ئه‌میر گۆگه، رێڤه‌به‌رێ ناحیا كانى ماسێ بۆ رۆژناما ئه‌ڤرۆ دیار كر، 28/1/2017 و ل ده‌مژمێر نه‌هى سپێدێ ئه‌و تى ئێن تى یه په‌قى و گۆت: “هه‌رچه‌نده زیانێن مه‌زن گه‌هاندینه جادێ، لێ خۆشبه‌ختانه ل ده‌مێ په‌قینا وێ تى ئێن تى یێ چ ترۆمبێل نێزیكى وى جهى نه‌بوون، له‌ورا چ زیانێن گیانى ژ ڤێ روودانێ په‌یدا نه‌بووینه، هه‌ر چه‌نده ده‌نگه‌كێ بهێز ژێ هات”.
ناڤهاتى ئاشكرا ژى كر، ل ده‌مێ په‌قینێ پۆلیس و ئاسایشا كانى ماسێ ل جهێ روودانێ به‌رهه‌ڤ بوون و ڤه‌كۆلین ل سه‌ر ڤى بابه‌تى هاتیه كرن و گۆت: “هه‌تا نوكه نه‌هاتیه زانین كانێ كێ ئه‌و تى ئێن تى دانایه وى جهى، چونكى ئه‌ڤه ئێكه‌م روودانه ب ڤى ره‌نگى ل ڤێ ده‌ڤه‌رێ روو دده‌ت”.
