تۆرێن جڤاكى ل عيراقێ وهه‌رێما كوردستانێ دێ دووباره كاركه‌ن
ئه‌ڤرۆنيوز:
وه‌زاره‌تا ڤه‌گۆهاستنێ وگه‌هاندنێ ل هه‌رێما كوردستانێ راگه‌هاند، ل كوردستانێ چو هێلێن ئه‌نترێنتێ نه‌هاتينه راوه‌ستاندن وهنده‌ك كۆمپانيان ب خوه كێشه يا هه‌ى، دياركر ژى ل سه‌ر داخوازا وه‌زاره‌تا ڤه‌گۆهاستنێ وگه‌هاندنێ ل عيراقێ، تۆرێن جڤاكى ل هه‌رێما كوردستانێ يێن هاتينه راگرتن.
راگرتنا تۆرێن جڤاكى ژئه‌گه‌رێ خوه‌نيشادانێن ل هنده‌ك پارێزگه‌هێن عيراقێ يه، هه‌روه‌سا ل هه‌رێما كوردستانێ ژى زێده‌تر ژ 60 كۆمپانيێن دبوارێ ئه‌نترنێتێ دا يێن هه‌ين وكار دكه‌ن.
ئومێد محه‌مه‌د سالح، په‌يڤدارێ وه‌زاره‌تا ڤه‌گۆهاستن وگه‌هاندنێ ل هه‌رێما كوردستانێ، ل دووڤ كورمستان تى ڤى، ل دۆر راوه‌ستانا تۆرێن ئه‌نترنێتێ، گۆت” پێشبينيێ دكه‌ين ئه‌ڤرۆ ئێكشه‌مبى 15/7/2018 هه‌موو تۆرێن جڤاكى ل عيراقێ وهه‌رێما كوردستانێ كار بكه‌ن”.
سه‌باره‌ت راگرتنا هێلا ئه‌نترنێتێ ل هه‌رێما كوردستانێ، ئومێدى گۆت” ل هه‌رێما كوردستانێ ول سه‌ر داخوازا وه‌زاره‌تا ڤه‌گۆهاستنێ وگه‌هاندنێ ل عيراقێ، تۆرێن جڤاكى يێن هاتينه راگرتن، به‌لێ چو هێله‌كا ئه‌نترنێتێ ل سه‌ر ئاخڤتنا مه نه هاتينه راگرتن، به‌لكو هنده‌ك كۆمپانيان ب خوه كێشێن هه‌ين، له‌وما هێلێن وان يێن راوه‌ستاين”.
