تۆڕێن ئاڤا دهۆكێ دێ هێنه رێكخستن و ئاڤا 24 ده‌مژمێری نامینیت
هه‌ولێر، قائید میرۆ
رێڤه‌به‌ریا گشتیا ئاڤێ ل هه‌رێما كوردستانێ كار بۆ دوباره رێكخستنا تۆڕێن ئاڤێ دكه‌ت و رێڤه‌به‌رێ گشتیێ ئاڤێ ژی ئاماژه‌كر، ل سنورێ پارێزگه‌ها دهۆكێ پرۆسا رێكخستن و دانانا تۆڕێن ئاڤێ دێ هێنه بجهئینان هه‌تا ئاڤ ب عه‌داله‌ت بگه‌هیته وه‌لاتیان.
ئاری ئه‌حمه‌د، رێڤه‌به‌رێ گشتیێ ئاڤێ ل هه‌رێما كوردستانێ بۆ رۆژناما ئه‌ڤرۆ گۆت “هه‌تا نوكه 63%ێ یا پشكدارێن ئاڤێ پیڤه‌رێن ئاڤێ گرێداینه و پرۆسا گرێدانا پیڤه‌رێن ئاڤێ ژی یا به‌رده‌وامه، ل سه‌رانسه‌ری هه‌رێما كوردستانێ ژی مه نێزیكی دو ملیۆن پشكدارێن ئاڤێ هه‌نه، ل گۆره‌ی قانوونێ پێدڤیه هه‌موو پشكداره‌كێ ئاڤێ پیڤه‌ری گرێبده‌ت و به‌رۆڤاژی دێ سزایێن قانوونی بۆ هه‌بن، چونكو دانانا پیڤه‌ری پێنگاڤا ئێكێ یه ژ بۆ رێگریكرن ل هه‌ده‌ردانا ئاڤێ، رۆژانه تیمێن تایبه‌ت مژوولی دانانا پیڤه‌ران و دێ به‌رده‌وامی ژی هه‌تا ئێك مال یان پشكدار مابیت بۆ گرێدانا پیڤه‌ری.
رێڤه‌به‌رێ گشتیێ ئاڤێ دیار كر “بڕیاره تۆڕێن ئاڤێ ل دهۆكێ بهێنه رێكخستن و پرۆسا رێكخستنا تۆڕێن ئاڤێ و دانانا تۆڕێن ئاڤێ دێ چیته د بیاڤێ بجهئینانێ دا، هه‌ر تاخه‌ك یان جهه‌كێ تۆڕێن ئاڤێ نه‌بن ئه‌ڤه دێ ژلایێ فه‌رمانگه‌هێن حوكمه‌ت تۆڕێن ئاڤێ بۆ هێنه دانان، هه‌روه‌سا نوكه كار بۆ ته‌مامكرنا پڕۆژێ ستراتیژیا ئاڤا ئاكرێ دهێته‌كرن و هه‌تا نوكه 58% پڕۆژه هاتیه بجهئینان، ئه‌و ژی پشتی سالا بۆری حوكمه‌تێ 18 ملیار دینار بۆ مه‌زاختی، نوكه مه داخوازا كوژمه‌كێ دی یێ پاره‌ی بۆ ئاڤا ئاكرێ كریه بۆ ته‌مامكرنا پڕۆژێ ئاڤا ئاكرێ، كو ئاڤێ ل قه‌ندیل بۆ سه‌نته‌رێ قه‌زا ئاكرێ ڤه‌دگوهێزیت و ب ته‌مامبوونا ڤی پڕۆژه‌ی دێ ئاریشا ئاڤێ ل سه‌نته‌رێ قه‌زا ئاكرێ و گوندێن ده‌وروبه‌رێ ئاكرێ هێته چاره‌سه‌ركرن.
ل دۆر بڕیارا به‌لافكرنا ئاڤێ ئاری ئه‌حمه‌د ئاشكرا كر “ژ به‌ر كو رێژه‌كا زۆرا ئاڤێ ژلایێ وه‌لاتیان ڤه دهێته بكارئینان و ئه‌و ئاڤه ژی ب هه‌ڕوه دچیت، مه خواستیه رێگریێ ل ڤێ دیاردێ بكه‌ین و ئاڤا ڤه‌خوارنێ ب ئێكسانی به‌لاڤبكه‌ین، پلانا حوكمه‌تا هه‌رێما كوردستانێ ب چو شێوه‌یه‌كی ئاڤا 24 ده‌مژمێری نه‌مینیت، واته نابیت ئاڤ 24 ده‌مژمێران بۆ چ تاخه‌كی بهێته به‌ردان، به‌لكو هه‌ر رۆژه‌كێ نه ئێكێ بۆ چه‌ند ده‌مژمێران ئاڤ بهێته به‌ردان.
زێده‌تر گۆت: مه‌ره‌م ژ ڤێ بڕیارێ ئه‌ڤه هه‌م رێگری ل هه‌ده‌ر دانا ئاڤێ بهێته‌گرتن، هه‌م ژی ئاڤ بۆ ڤان جهان ژی بچیت یێن ئاریشا نه‌بوونا ئاڤێ هه‌ی، چونكو حوكمه‌ت سالانه پاره‌یه‌كێ زۆر بۆ به‌رهه‌مئینانا ئاڤا پاقژ د مه‌زێخیت و مخابن هنده‌ك وه‌لاتی ژی ئابوورێ د ئاڤێ دا ناكه‌ن، هه‌تا زۆر به‌ردانا ئاڤێ كاریگه‌ری هه‌یه ل سه‌ر كریا ئاڤێ و وه‌لاتی ب خوه گازندا دكه‌ن پاره‌یه‌كێ زۆر بۆ كریا ئاڤێ دهێت ئه‌ڤه ژی ئه‌گه‌ر ئه‌ڤه ئاڤ ل هنده‌ك ده‌ڤه‌ران یا زۆره و ئابورێ تێدا ناكه‌ن، له‌وڕا ژی هه‌یڤانه كریه‌كا زۆر دكه‌ڤیته ل سه‌ر وه‌لاتیان.
