تێستا سه‌رژمێریا ئیراقێ ب ئه‌لكترۆنی ل دهۆكێ ده‌ست پێ كر
ئه‌ڤرۆ، نه‌وزاد هلۆری:
ب به‌رهه‌ڤبوونا ده‌سته‌یا تیما سه‌رژمێریا ئیراقێ، روونشتنه‌كا به‌رفره‌هـ یا چه‌ند رۆژی ل دۆر ئه‌نجامدانا تێستا سه‌رژمێریا گشتی ل ئیراقێ ل دهۆكێ ده‌ست پێ كر.
ماجد سه‌ید سالح، جێگرێ پارێزگارێ دهۆكێ دیار كر كو ئه‌ڤه دۆرێن 60 سالایه چو سه‌رژمێریێن سه‌رانسه‌ری ل ئیراقێ نه‌هاتینه كرن و بۆ رۆژناما ئه‌ڤرۆ گوت: “بڕیاره ل دووماهیا سالا 2022ێ سه‌رژمێریا سه‌رانسه‌ری ل ئیراق و هه‌رێما كوردستانێ ژی بهێته كرن، ژ به‌ر ڤێ چه‌ندێ و د چارچوڤێ خوه به‌رهه‌ڤكرنێ دا ئه‌ڤ رونشتنا به‌رفره‌هـ بۆ ئه‌نجامدانا سه‌رژمێریا گشتی ل ئیراقێ ب شێوازێ تێست هاته كرن كو دێ ب ئه‌لكترۆنی ل چه‌ند گه‌ڕه‌ك و تاخێن دهۆكێ هێته كرن”.
ماجد سه‌ید سالح زێده‌تر گوت: “تێكچوون و ئارام نه‌بوونا ره‌وشا ئیراقێ ب تایبه‌تی ژ روویێ سیاسی ڤه كارتێكرن ل ئه‌نجامدانا سه‌رژمێریا سه‌رانسه‌ری كریه، هه‌ر چه‌نده نوكه ژی وه‌كو پێدڤی دبیت ره‌وش یا هه‌ریكار نه‌بیت، به‌لێ ب ره‌نگه‌كێ گشتی ژ به‌ری نوكه باشتره”.
ناڤبری دیار كر ژی كو سه‌رژمێریا سه‌رانسه‌ری یا ئیراقێ گرنگیه‌كا زۆر هه‌یه و گوت: “د چارچوڤێ سه‌رژمێریێ دا دێ بۆ هه‌موو لایه‌كی روهن بیت كا هه‌ژمارا روونشتڤانێن ئیراق و كوردستانێ چه‌نده، داكو ل دووڤ وێ سه‌رژمێریێ كار و چالاكی و پرۆژه و خزمه‌تگۆزاری و بودجه و هه‌تا دووماهیێ بێ جوداهی بۆ ده‌ڤه‌ر و وه‌لاتیان بهێنه كرن، دڤێت سه‌رژمێری هه‌موو گوند و كۆمه‌لگه‌هـ و باژێر و باژێركان ل دۆر و نێزیك و ده‌ڤه‌رێن ئاریشه‌دار ژی بهێته كرن، ژ به‌ركو بۆ مه وه‌كو هه‌رێما كوردستانێ گه‌له‌كا گرنگه”.
