تێکچوونا رەوشا ھەرێما کوردستانێ دێ کارتێکرنێ ل ھەموو دەڤەرێ کەت
ئه‌ڤرۆ نيوز:
حەفتیا بۆری ھەرسێ ولاتێن تورکیا و رۆسیا و ئیران ل وەلاتێ تورکیا لدۆر رەوشا دەڤەرێ کۆمبوون و شارەزایێن سیاسی ژی بۆچوونێن جودا ھەنە لدۆر مژارێن کۆمبوونێ، کەساتیەکێ ئەکادیمی دبێژیت، کۆمبوون لدۆر رەوشا دەڤەرێ و لاوازکرنا پێگەھێ کوردان بوو، د بەرامبەردا مامۆستایەکێ زانکۆیێ رەتکر کۆمبوونا ھەرسێ وەلاتان پەیوەندی ب ھەرێما کوردستانێ ڤە ھەبیت.
دکتۆر سامان شالی، کەساتیێ ئەکادیمیێ کورد بۆ رۆژناما ئەڤرۆ گۆت” کۆمبوونا حەفتیا بۆری د ناڤبەرا ھەرسێ وەلاتێن دەڤەرێ رۆسیا و ئیران و تورکیا لدۆر رەوشا دەڤەرێ بگشتی و تایبەت رەوشا سووریا بویە، کا چاوا رۆلێ ئەمریکا ل دەڤەرێ ب ھێتە کێمکرن و دھەمبەردا رۆلێ رۆسیا بھێتە زێدەکرن، چونکە ھەر چەندە ل گەلەک پرسان ھەرسێ وەلات ناکۆکن، بەلێ ھەر ئێک ژوان پشکا خوە دڤێت ل دەڤەرێ، لەوڕا ب دیتنا من کۆمبوونێ گرنگیا خوە ھەیە بۆ دەڤەرێ، بەری نوکە ھەرسێ وەلات لدۆر لاوازکرنا پێگەھێ کوردان ل عێراق و سووریا رێککەفتبوون، بتایبەتی دەمێ ھەرێما کوردستانێ پێنگاڤ بەر ب سەربخۆەیێ ھاڤێتین شیان رێگریێ بکەن.
ژ لایێ خۆڤە دکتۆر ساڵح مەلا عومەر پسپۆرێ زانستێن سیاسیێ بۆ رۆژناما رەتکر” کۆمبوونێ چو پەیوەندی ب رەوشا ھەرێما کوردستانێ و پێگەھێ کوردان ل دەڤەرێ ھەبیت و دبێژیت، کۆمبوونا ناڤبەرا حەسەن رۆحانی و ئەردۆغانی تایبەت بۆ ب رەوشا نوکەیا سووریا و ئاریشەیێن ئەڤی وەلاتی، ژبەر کو بەرژەوەندیێن ھەرسێ وەلاتێن رۆسیا و تورکیا و ئیرانێ ل ناڤا سووریێ دا ناکۆکی لسەرە، لەو مەرەم ل کۆمبوونێ بۆ لێک تێگەھشتنێ د ناڤبەرا ھەرسێ وەلاتان لدۆر رەوشا سووریا ھەتا نەبیتە ئەگەرێ تێکچوونا پەیوەندیێن ناڤبەرا وان و رەوش د بەرژەوەندیا ھەرسێ لایاندابیت، بتایبەتی ئەمریکا و فەڕەنسا بزاڤێن جێھگیرکرنا بەرژەوەندیێن خوە ل سووریا ددەن.
دکتۆر ساڵح مەلا عومەر دیارکر، ئەز بخوە د ئەڤێ باوەریێ دا نیمە د کۆمبوونا حەفتیا بۆری ل تورکیا ب چو شێوەیەکی بەحسێ ھەرێما کوردستانێ ھاتبیتەکرن، چونکە د بەرژەوەندیا ئەڤان وەلاتاندا نینە رەوشا تەنایا ھەرێما کوردستانێ تێکبچیت، ھەتا دشێم بێژم ھەرسێ وەلاتێن کۆمبووین بەرژەوەندیێن جودا ھەنە ل ھەرێما کوردستانێ، ھەردەمێ رەوشا ھەرێما کوردستانێ بەر ب ئالۆزیێ بچیت بەرژەوەندیێن وان ژی دێ ژ ناڤچن و تێکچوونا رەوشا تەناھیا ھەرێما کوردستانێ دێ راستەوخۆ کاریگەری لسەر رەوشا ئیران و تورکیا ھەبیت، دەربارەی رۆسیا ژی نوکە ئەم ھەموو دزانین چەندین مەزنە کۆمپانیێن رۆسیا رێکەفتن دگەل حوکمەتا ھەرێما کوردستانێ ئەنجامداینە بۆ وەبەرھێنانێ ل کێلگەھێن پەتڕۆلا ھەرێما کوردستانێ دا.