تەكنۆلۆژیا و كارتێكرنا وێ
سندس سالح سلێڤانەیی
د چەرخێ نوكە دا، تەكنۆلۆژیا بوویە پشكەكا بنەرەتی د ژیانا مە یا ڕۆژانە دا و ب شێوەیەكێ مەزن كارتێكرن ل سەر شێوازێ ڕەفتار و ئاخفتنا مە كرییە، ئەڤ پێشكەفتنا ب ئامێرەیێن ئەلیكترۆنی و تورێن جڤاكی هاتینە ئافراندن، ژ لایەكی ڤە خزمەتەكا زۆرا جیهانێ كرییە ب كێمكرنا دووراتیان و ب ساناهیكرنا گەهشتنا پێزانیان، بەلێ ژلایەكێ دی ڤە كارتێكرنەكا نەرێنی ل سەر پەیوەندیێن جڤاكی و خێزانی دروستكرییە.
بۆچوونا پتریا شارەزایێن جڤاكی ئۆ ئەوە كو تەكنۆلۆژیا بوویە ئەگەرێ ساربوونا پەیوەندیان د ناڤبەرا ئەندامێن ئێك خێزان دا و ئەڤرۆ ئەم دبینین كو ل پتریا مالان، ئەندامێن خێزانێ ل ئێك جهـ كۆمبووینە، بەلێ هەر ئێك ژ وان مژوولی شاشەیا تەلەفۆن یان ئامێرێ خۆ یێ ئەلیكترۆنی یە و ئەڤ دۆخە بوویە ئەگەرێ كێمبوونا ئاخفتن و سوحبەتێن مالێ و ب ڤێ چەندێ ژی تێگەهشتن و هەڤسۆزی د ناڤبەرا دایك و باب و زاڕۆكان دا بەرەف كێمبوونێ دچیت.
ژلایەكێ دی ڤە، ئاولدەبوونا گەنج و زاڕۆكان ب یارێن ئۆنلاین و پلاتفۆرمێن جڤاكی ب شەڤ و ڕۆژ، كارتێكرنەكا خراپ ل سەر ساخلەمیا وان یا دەروونی و جەستەیی دكەت. كێمبوونا تەڤگەڕێ، تێكچوونا شێوازێ نڤستنێ و دووركەفتن ژ چالاكیێن جڤاكیێن ڕاستەقینە ژ ئەنجامێن دی یێن ڤێ دیاردێ نێگەتیڤن، ژبەرهندێ گەلەكا گرنگە خێزان سنوورەكی بۆ بكارئینانا ڤان ئامیرەیان دانن و د ئەنجام دا، تەكنۆلۆژیا ئامرازەكە و بكارئینانا وێ دكەڤیتە سەر شێوازێ سەرەدەریا مە و پێدڤییە ئەم ب شێوەیەكێ ژیرانە هەڤسەنگیێ د ناڤبەرا مفا وەرگرتن ژ تەكنۆلۆژیایێ و پاراستنا پەیوەندیێن گەرم و گوڕ یێن خێزانی دا دروست بكە ین و ڕاهێنانا زاڕۆكان ل سەر بكارئینانا ڕاست و سنوور داركرنا دەمێ ل سەر شاشەیان، دێ بیتە ئەگەرێ ئاڤاكرنا خێزانەكا ساخلەم و جڤاكەكێ هشیارتر.
ئەڤجا وەرن هەر نوكە دا هە رئێك ژمە ژمالا خۆ و زاڕۆكێن خۆ دەست پێبكەت بەری كو ژبەر دەستێن مە دەركەڤن و یا گرنگە خشتەیەكی بۆ بدانین كو ڕۆژانە وی هندەك خۆلەكان یان دەمژمێرەكێ و نە زێدەتر تەلەفۆنێ یان ئایپاتێ بكار بینیت و دێ باشتر بیت هەكە ئەو دەم د رۆَژێ دا بیت و شەڤ ژی بۆ خواندن و زوو نڤستنێ بیت و بڤی ڕەنگی دێ مە زارۆِكەكێ ژیرتر و زیرەكتر هەبیت، هەروەسا دێ پاشەڕۆژ وی ژی گەشتر و سەركەفتی تر بیت و بڤی ڕەنگی ئەم هەموو دێ پتر شانازیێ پێ یەین.
