جارا ئێکێ يه ژمارا دروست یا گۆڕێن ب کۆم ل شنگال دھێتە ئاشکراکرن
ئه‌ڤرۆ نيوز:
ئەندامەکێ دەستەیا ڤەکۆلینێ و کۆمکرنا بەلگەنامەیان ل دھۆکێ دیارکر کو ھەتا نوکە 65 گۆڕێن ب کۆم یێن ھاتینە دیتن ژ وان ژی پێرابوون ل سەر 44 گۆڕێن ب کۆم ل شنگال ھاتینە وەرگرتن و 21 گۆڕێن دێ یێن ب کۆم یێن ھاتینە دیتن ھێشتا پێرابوون ل سەر نەھاتینە وەرگرتن.
فەلاح حەسەن، ئەندامێ دەستەیا ڤەکۆلینێ و کۆمکرنا بەلگەنامەیان ل دھۆکێ بۆ ئەڤرۆ دیارکر کو ئەو گۆڕێن ب کۆم یێن پێرابوون ل سەر ھاتینە کرن 42 گۆڕێن ب کۆمن و دو گۆڕ ژ وان تاکە کەسەکی نە.
ل دووڤ قانوونا گۆڕێن ب کۆم ل عیراقێ ھەر گۆڕەکێ دو کەس تێدا بن دھێتە ھژمارتن گۆڕێ ب کۆم، ھەکە کەسەک تێدا بیت ناھێتە ھژمارتن گۆڕێ ب کۆم، بەلکو دبیتە تاکە کەسی.
خۆیا ژی کر کو روفاتێن 67 شەھیدان ژ گۆڕێن ب کۆم یێن ھاتینە دەرخستن و ل بەر مەزارگەھێ شەرفەدین یێن ھاتینە ڤەشارتن، “ئەڤ کارە ل دووڤ قانوونێن عیراقێ ھاتیە کرن”.
ئاشکەرا ژی کر کو ژ وان ژی پێنج گۆڕێن ب کۆم ل سنۆنێ یێن ھاتینە ڤەکرن و ئێک ژی ل خانەسۆرێ و دو ژی ل دوھۆلا دەڤەرا بەردیە.
ئاماژە دا وی چەندێ ژی کو وان پێزانین ل سەر جھێ 21 گۆڕێن ب کۆم ھەنە، بەلێ ھێشتا پێرابوون ل سەر نەھاتیە وەرگرتن ژ بەر رەوشا نوکە ل قەزا شنگال ھاتیە پێش و گۆت: “ژ وان ژی 18 گۆڕێن ب کۆمن و سێ گۆڕ یێن تاکە کەسی نە و سەرجەمێ وان ھەموویان دبیتە 65 گۆڕێن ب کۆم”.
زێدەتر گۆت: ” کار ب تنێ ل سەر 44 گۆڕێن ب کۆم یێ ھاتیە کرن و ھێشتا کار ل سەر 21 گۆڕێن ب کۆم نەھاتیە کرن، ئەو ژی ل گۆندێ کۆچۆ و رامبووسی و سولاغ و سیبا شێخدر و گەلی حاجی و سکینێ و قابووسی کو 10 گۆڕ ل گوندێ کۆچۆ ھەنە ب شێوەیەکێ گشتی سەرجەمێ وان.
ئەندامێ دەستەیا ڤەکۆلینێ و کۆمکرنا بەلگەنامەیان ل دھۆکێ ئاشکرا کر کو کەس نەشێت پێشبینی بکەت چەند روفاتێن شەھیدان د ناڤ ڤان گۆڕێن ب کوم دا ھەنە چونکو چو نەھاتینە ڤەکرن و د بن ئاخێ دانە و پێدڤیە ب رێیا نوشداریا داد و بەلگەیێن پێدڤی ژ لایێ بەغدا ڤە ب ھێنە ھاڤێتن و گۆت: “ھەتا نوکە ب تنێ ھەرێما کوردستانێ پشتەڤانیا مە دکەت”.
رائید فەلاح حەسەن گۆتژی: “ھەکە ھات و کەسەکی دەست د تاوانا شنگال دا ھەبیت و دەستکاری د گۆڕەکێ ب کۆم دا بکەت بۆ ڤەشارتنا تاوانێن خوە، قانوونەک ھەیە و دێ ل دووڤ قانوونێ سەردەریی دێ ل گەل وی ھێتە کرن و ب تایبەت جڤاتا دادگەھا بلند ل بەغدا و لیژنا جینۆسایدێ دێ سەرەدەریێ ل گەل کەن”.
نەڤەشارت ژی کو ھەتا نوکە چو کەسەکی دەستکاری د گۆڕێن ب کۆم دا نەکریە و نوکە حەلکێ شنگال ژی ھەتا رادەکێ باش یێن گەھشتینە وێ باوەریێ کو پێدڤیە گۆرێن ب کۆم ب رێیێن نێڤدەولەتی بھێنە ڤەگرن ژ بەر جینۆسایدا کارەساتا شنگال.
