جه‌مال كۆچه‌ر ده‌ستخۆشيێ ل نێچيرڤان بارزانى دكه‌ت
ئه‌ڤرۆ نيوز:
پشتى سه‌رۆكێ حوكمه‌تا هه‌رێما كوردستانێ نێچيرڤان بارزانى ديداره‌ك ل گه‌ل ژماره‌كا رۆژنامه‌ڤانێن ميديايى ئه‌نجام دا و رێ ب رۆژنامه‌ڤانان هاتيه دان كو هه‌ر پرسيارا بڤێت بكه‌ن، په‌رله‌مانتاره‌كێ يه‌كگرتوو راگه‌هاند كو ئه‌ڤ كارێ وى جهێ ده‌ستخۆشيێ بوو.
جه‌مال كۆچه‌ر كه‌ساتيێ به‌رنياسێ پارێزگه‌ها دهۆكێ و ئه‌ندامێ جڤاتا نوونه‌رێن عيراقێ ل سه‌ر به‌هرا يه‌كگرتوويا ئيسلامى كوردستان د گۆتاره‌كێ دا ل سه‌ر په‌يجێ خوه يێ تۆڕا جڤاكيا فه‌يسبۆكێ راگه‌هاند كو بۆ جارا ئێكێ يه ل هه‌رێما كوردستانێ ب هه‌موو جورئه‌ت و شه‌فافيه‌ت وه‌سان ده‌رفه‌ت ب ده‌سته‌لاتا چارێ “راگه‌هاندنێ” دهێته دان هه‌ر پرسيارا بيت ئاراسته‌يى سه‌رۆكێ حوكمه‌تێ بكه‌ن.
كۆچه‌ر ده‌ستخۆشيێ ژى ل سه‌رۆكێ حوكمه‌تێ دكه‌ت و داخوازا دووباره ئه‌نجامدانا ڤان ره‌نگه ديداران دكه‌ت و هيڤى دكه‌ت كو ئه‌ڤ ره‌نگه ديداره ل گه‌ل گه‌له‌ك ته‌خێن دى يێن جڤاكى ژى بهێنه ئه‌نجام دان.
ئه‌ڤ ئه‌ندامێ جڤاتا نوونه‌ران گرنگيا ڤان ره‌نگه ديداران د 12 خالان دا ديار دكه‌ت و كو د ده‌قێ گۆتارا خوه دا ئاماژه پێكريه و ئه‌ڤا ل خوارێ ژى ده‌قێ وێ گۆتارێ يه:
نێچیرڤان بارزانى و ده‌زگه‌هێن راگه‌هاندنێ
پێنگاڤه‌كا ب جورئه‌ت و ئاڤاكرنه‌كا (12) لایه‌نى
بو جارا ئێكێ یه ل هه‌رێما كوردستانێ ب هه‌مى جورئه‌ت و شه‌فافیه‌ت و ئه‌و په‌رێ ئازادیێ ده‌رفه‌ت ب ده‌ستهه‌لاتا چوارێ (راگه‌هاندنێ) د هێته دان كو روى ب روى هه‌ر چ پسیارا هه‌بیت ئاراسته‌ى سه‌روكێ حكومه‌تێ بكه‌ن .. پێنگه‌ڤه‌كا د جهێ خودا بو و و یاگرنگ بو ژ مێژه هات با هاڤێتن .. و یا ژ هه‌ژى ده‌ست خوشى و پشته‌ڤانیێ یه ..
ب ده‌رفه‌ت د زانم بێژمه سه‌روكێ جڤاتا وه‌زیرێن هه‌رێما كوردستانێ ده‌ست خوش بو ڤێ پێنگاڤا ئاڤاكه‌ر .. و داخواز ژ جه‌نابێ هه‌وه دكه‌م ڤان جوره دیداران وه‌رزانه دووباره بكه‌ن .. و نه بتنێ دگه‌ل روژنامه‌ڤانان به‌لكو دگه‌ل چه‌ندین ته‌خێن دی یێن گرنگ ژى وه‌ك (سه‌ركرده‌یێن حزبى و كه‌سایه‌تیێن سیاسه‌تمه‌دار و نڤیسه‌ر و ره‌وشه‌نبیر .. و هتد) و هه‌مى ل سه‌ر شاشه‌یێن تیڤیان بهێنه په‌خشكرن هه‌ر وه‌كى دیدارا 6/8 دگه‌ل روژنامه‌ڤانان .
و هیڤى خوازم سه‌روكێ هه‌رێمێ و سه‌روكێن حزبێن سیاسى ڤێ پێنگاڤێ ب هاڤێژن .. چونكه دێ پێنگاڤه‌كا سود مه‌ند بیت د چه‌ند لایان دا و ژ وان :
1- پێش ئێخستنا پروسێسا سیاسى ل هه‌رێما كوردستانێ .
2- دێ بیته هێڤێنێ ئێك رێزى و ئێك هه‌لویستیێ .
3- رێخوشكه‌ر بو تێگه‌هشتنه‌كا هه‌ڤبه‌ش .
4- بناغه بو ئازادیه‌كا ئاڤاكه‌ر .
5- راستڤه‌كرن بو چه‌ندین تێگه‌هشتنێن خه‌له‌ت .
6- زێده‌ركنا متمانێ ل ده‌ف هاولاتیان .
7- هانده‌ر بو شه‌فافیه‌ته‌كا زێده‌تر .
8- رێگرى كرن ل زیانێن تێگه‌هشتنا خه‌له‌ت .
9- هشیاركرنا هه‌ستێ به‌رپرسیاره‌تیێ .
10- ده‌ستنیشاكرنه بو خالێن هێزێ و لاوازیێ .
11- رێگره ل په‌یدابونا دكتاتوریه‌تێ .
12- ده‌سپێكه بو هاڤێتنا چه‌ندین پێنگاڤێن دى یێن ئاڤاكه‌ر .
ئێدى بلا هاڤێتنا پانگاڤان بو خزمه‌تكرنا هاولاتیێن هه‌رێما كوردستانێ بیت .
د.جمال كوچه‌ر
ئه‌ندامێ جڤاتا نوینه‌رێن عیراقێ