جوره‌كێ كولیێ زیان ب به‌رهه‌مێ جوتیارێن ئه‌ترۆش گه‌هاندیه
ئه‌ڤرۆ نیوز، بارزان مزوورى:
ل سنورێ ناحیا ئه‌ترۆش جوره‌كێ” كولى” زیانێن مه‌زن گه‌هاندینه جۆتیارێن ده‌ڤه‌رێ به‌رهه‌مێ وان یێ ئه‌ڤسالە یێ گندۆر و تروزیا ب ئێكجارى ژناڤبریه.
سلێمان ئه‌مین، ئێك ژ جوتیارێن گوندێ مێرسیدا سه‌ر ب ناحیا ئه‌ترۆش بۆ ئه‌ڤرۆ نیوز گۆت: (ئه‌ڤه بۆ ئێكه‌م ساله ئه‌ڤ جورێ كولى دهێته دیتن ل ده‌ڤه‌رێ ره‌نگێ وى یێ “ره‌شه” هه‌ر جهه‌كێ لێ دانشیت وى جها ناچن هه‌تا ئه‌و جهه‌ك بهێته ناڤبرن ئه‌ڤ كولیه ل دووماهیا هه‌یڤا ره‌مه‌زانێ ده‌ركه‌فتیه ئه‌و به‌رهه‌مێ ئه‌ڤسالە یێ گندۆر و ترۆزیا سه‌دان دونه‌م یێن ناڤبرین).
ناڤهاتى خویاكر دو جاران ب ئامیرێن ره‌شاندنێ ره‌شاندیه به‌لێ یا بێ مفا بوویه رۆژ ب رۆژێ رێژا وان زێده‌تر لێ دهێت ئه‌و به‌رهه‌مێ هاتیه چاندن ل سه‌ر عه‌ردى را بریه، ژبلى به‌رهه‌مێ جوتیارا به‌لگێن چلى و داروبارى تێكداینه ئه‌گه‌ر ب ڤى شێوه‌ى بیت ئه‌ڤسالە جوتیار دێ تووشى زه‌ره‌رێن مه‌زن بن.
ژلایه‌كێ دى ڤه عومه‌ر حسێن، به‌رپرسێ هوبا چاندنێ ل ئه‌ترۆش بۆ ئه‌ڤرۆ نیوز گۆت: (ئه‌و جوتیارێن مه به‌رى نها ده‌رمانێ كوشتنا سنكى دایه وان ئه‌وى ده‌رمانى دشێن بكار بینن بۆ كوشتنا ڤى جورێ كولى ژ به‌ر كو كولی مه‌ترسیه بۆ ده‌ڤه‌رێ).
ناڤهاتى خویاكر تیمێن مه یێن چاندنێ دێ سه‌ره‌دانا وان جهه‌ن كه‌ن یێن كولى زیان پێ گه‌هاندى .
