جڤاتا ئاسايشا هه‌رێما كوردستانێ به‌رسڤا رژێما سووريێ دده‌ت
ئه‌ڤرۆنيوز:
جڤاتا ئاسايشا هه‌رێما كوردستانێ ئه‌ڤرۆ ئێكشه‌مبى 30/12/2018 به‌ياننامه‌ك ده‌ركر وتێدا دبێژيت”هنده‌ك ده‌زگه‌هێن راگه‌هاندنێ يێن ب سه‌ر رژێما سووريێ دچارچۆڤێ ليسته‌كا دوور ودرێژ يا وان كه‌سێن هاريكاريا ئۆپۆزسيۆنا سوورى كرى، ب پشته‌ڤانێن تيرۆرێ ناڤ دكه‌ن، ئاماژه ب ناڤێ به‌رێز مه‌سرور بارزانى شيره‌تكارێ جڤاتا ئاسايشا هه‌رێما كوردستانێ هاتيه كرن”.
دبه‌يانناما جڤاتا ئاسايشا هه‌رێمێ دا هاتيه” جهێ پێكه‌نينێ يه كو رژێما شۆفينى وسه‌ركوتكار ودژه كورد كو بۆ مانا خوه پشته‌ڤانيا تيرۆرستان كريه دا وه‌كو به‌ديله‌كێ باشتر ژ تونده‌رويێن خوه بينيت به‌حسێ تيرۆرێ بكه‌ت”.
دياركر ژى” رژێمه‌ك كو چه‌كێ قه‌ده‌غه‌كرى دژى خه‌لكێ سڤيل بكارئينابيت وب سه‌دان هزار وه‌لاتيێن سوورى ب خوينێ وه‌ركربن ومليۆنێن دى ژى ئاواره‌ى وه‌لاتێن ده‌وروبه‌ر كربيت، دڤێت چو ئيعتيباره‌ك هه‌بيت تاكو بانگه‌شا دروستكرنا ليسته‌كا وه‌سا بكه‌ت؟”.
تێدا هاتيه ژى” ئه‌وا زێده‌تر جهێ پێكه‌نينێ ئه‌وه كو هنده‌ك سنێلێن سياسى وگه‌نده‌لكار وخائين ده‌هۆلێ بۆ وى ده‌نگوباسى لێ دده‌ن”.
ئاماژه كريه” ئه‌وا كو رژێما سووريێ تووره‌كرى، پشته‌ڤانيا شيره‌تكارێ جڤاتا ئاسايشا هه‌رێمێ بوو بۆ هێزێن ره‌سه‌ن يێن رۆژئاڤايێ كوردستانێ يه وشانازيه بۆ مرۆڤى كو بهێته تۆمه‌تباركرن ب پشته‌ڤانيا خه‌لكێ سته‌ملێكرى وماخوار وجهێ سه‌ربلنديێ يه ژى كو ل ناڤخوه‌يا وه‌لاتى ل به‌ره‌يێ دژى گه‌نده‌لان وخوه‌فرۆشان ووه‌لاتفرۆشان بهێته هژمارتن”.
به‌ياننامێ خوياكريه ژى كو” داموده‌زگه‌هێن دبن سه‌رپه‌رشتيا شيره‌تكارێ جڤاتا ئاسايشا هه‌رێما كوردستانێ ژى وه‌كو هه‌ڤپشكه‌كێ كارا يێ هه‌ڤپه‌يمانيا نێڤده‌وله‌تى يا دژى تيرۆرێ، به‌رده‌وام گورزێن مه‌زن ل تيرۆرستان دايه ول دووماهى ئۆپه‌راسيۆنا تايبه‌ت دا ژى كو ل راگه‌هاندنا جيهانى ده‌نگڤه‌دايه، مه‌زنترين گرۆپا پشته‌ڤانيا دارايى يا تيرۆرستان وشووشتنا پاره‌ى وگه‌له‌ك كه‌س ولايه‌ن تێكهه‌لى وێ گرۆپى بوون”.
تێدا هاتيه ژى”هۆكارێ كينا خائين ووه‌لاتفرۆشان ودز وگه‌نده‌لێن ناڤخوه‌يى ژى ل به‌رامبه‌ر شيره‌تكارێ جڤاتا ئاسايشا هه‌رێما كوردستانێ بۆ وێ چه‌ندێ ڤه‌دگه‌ريت كو به‌رده‌وام دژى سيخورى وداگيركارى وتيرۆرێ وخيانه‌تێ وگه‌نده‌ليێن وان راوه‌ستايه وبه‌رده‌وام دێ ل روێ ره‌وتێ به‌رده‌وامى هه‌بيت ول رێزا به‌راهيێ يا دژه تيرۆرێ مينين”.
