جڤاتا ئاسايشا هه‌رێما كوردستانێ به‌ياننامه‌ك به‌لاڤكر
ئه‌ڤرۆنيوز:
جڤاتا ئاسايشا هه‌رێما كوردستانێ، ئه‌ڤرۆ چارشه‌مبى به‌ياننامه‌ك به‌لاڤكر وتێدا دبێژيت” مخابن ل چه‌ند رۆژێن بۆرى گرژى وئالۆزى ل چه‌ند ده‌ڤه‌رێن سنورێ سلێمانيێ وگه‌رميان وهه‌له‌بجه روودان كو زيانێن گيانى ومادى ژێ په‌يدابوون”.
جڤاتا ئاسايشا هه‌رێمێ دوێ به‌ياننامێ دا گۆت”خوه‌نيشادانێن شارستانى وئاشتيانه مافێ وه‌لاتيانه، به‌لێ ئه‌وا دهێته ديتن ده‌ركه‌فتنه ژ چه‌مكێ خوه‌نيشادانان، له‌وما داخوازێ ژ وه‌لاتيێن خوه‌شتڤى دكه‌ين رێ نه‌ده‌ن داخوازيێن وان يێن ره‌وا تێكهه‌لى ئه‌جندێن سياسى يێن كومانلێكرى يێن ناڤخوه‌يى وده‌ڤه‌رى ببن”.
جڤاتا ئاسايشا هه‌رێما كوردستانێ، داخواز چاڤ ڤه‌كرنا زێده‌تر ژ وه‌لاتيان دكه‌ت ودبێژيت” پێدڤيه گه‌لێ مه ب ئێك هه‌لويستى ڤێ قۆناغێ ده‌رباز بكه‌ت، پێدڤى بوو ئه‌ڤ خوه‌نيشادانێن نوكه ب ئاراسته‌يا دژايه‌تيا وێ سياسه‌تا نه‌ره‌وا يا ده‌ستهه‌لاتا به‌غدا بيت كو پشتى روودانێن 16 ئوكتۆبه‌رێ، سياسه‌تا دۆرپێچكرن وبرسى كرنا وه‌لاتيێن هه‌رێمێ بكارئينا”.
دياركر ژى” ده‌ستهه‌لاتدارێن به‌غدا خوه ژ دانوستاندنان ل گه‌ل هه‌رێمێ ڤه‌دزن ودهه‌مان ده‌مدا ژى دۆرپێچا ئابوورى وسياسى وگه‌فێن وان يێن له‌شكرى ل سه‌ر هه‌رێمێ دبه‌رده‌وامن، ئه‌و گره‌وى ل سه‌ر تێكچوونا ره‌وشا ناڤخوه‌يا هه‌رێمێ دكه‌ن، له‌وما ئه‌ڤ ره‌وشه ته‌لهه وداڤه‌كا مه‌ترسيداره كو شيرازا سياسى وجڤاكى يا هه‌رێمێ دكه‌ته ئارمانج”.
جڤاتا ئاسايشا هه‌رێما كوردستانێ دبه‌يانناما خوه‌دا، داخواز ژوه‌لاتيان دكه‌ت هه‌ستياريا قۆناغێ ل به‌رچاڤ وه‌ربگرن ورێ نه‌ده‌ن خه‌لكه‌ك ژبۆ داخوازيێن خوه په‌لامارى داموده‌زگه‌هان ومولكێ گشتى بده‌ن وداخواز ژ هه‌موو داموده‌زگه‌هێن ئه‌منى يێن هه‌رێمێ كر، ب شێوه‌كێ به‌رپرسانه به‌رهنگاريا هه‌ر كاره‌كێ تێكده‌رانه ببن وسه‌ر و مالێ وه‌لاتيان ومولكێن گشتى وسه‌قامگيرى وئاسايشا هه‌رێمێ بپارێزن.
