جڤاتا ئاسایشێ دێ كێشێن هه‌ولێر و به‌غدا گۆتوبێژ كه‌ت
ئه‌ڤرۆ نیوز:
بریاره جڤاتا ئاساییشا ناڤده‌وله‌تى كۆم ببیت و نوونه‌را تایبه‌تا سكرتێرێ گشتى یێ نه‌ته‌وه‌یێن ئێكگرتى ل ئیراقێ یونامى، دێ راپۆرتا خوه ل دۆر دوماهى پێشهاتێن ئیراقێ پێشكێش كه‌ت.
پیشبینى دهێته‌كرن ئاریشێن د ناڤبه‌را هه‌ولێر و به‌غدایێ دا پشكه‌ك بن ژ گۆتارا جینین پلاسخارت، نوونه‌را تایبه‌تا سكرتێرێ گشتى یێ نه‌ته‌وه‌یێن ئێكگرتى ل ئیراقێ.
كۆمبوونا جڤاتا ئاساییشا ناڤده‌وله‌تى د ده‌مه‌كى دایه كو رۆژا دوازده‌ى ڤێ مه‌هێ جڤاتا نوونه‌رێن ئیراقێ بێ به‌رهه‌ڤبوونا په‌رله‌مانتارێن كورد، قانوونا كورتئینانا دارایى ده‌ربازكر و ب ڤێ یه‌كێ ژى به‌رپرسێن بلند یێن كوردستانێ نه‌رازیبوون.
پێشتر نێچیرڤان بارزانى، سه‌رۆكێ هه‌رێما كوردستانێ راگه‌هاند بوو، كێشێن وان ل ئیراقێ گه‌له‌ك جدی نه و بێ چاره‌سه‌ركرنا وان كێشه‌یان، د شیان دا نینه ئیراق بشێت ئارامى و سه‌قامگیرییا خوه بپارێزیت، داخواز ژى كربوو نه‌ته‌وه‌یێن ئێكگرتى رۆلێ خۆه د وى بابه‌تى دا هه‌بیت.
جڤاتا ئاساییشا ناڤده‌وله‌تى یا سه‌ر ب نه‌ته‌وه‌یێن ئێكگرتى ڤه هه‌ر سێ هه‌یڤان جاره‌كێ بۆ هه‌لسه‌نگاندنا ره‌وشا ئیراقێ و به‌رنامێ یۆنامى كۆم دبیت
