جڤاتا نوونه‌ران داخوازا لێپرسينێ ژ بالوێزێ بريتانيا دكه‌ت
ئه‌ڤرۆ نيوز:
جڤاتا نوونه‌رێن عيراقێ داخوازا لێپرسينێ ژ بالوێزێ بريتانيا ل عيراقێ دكه‌ت و ب ده‌ستێوه‌ردان د كاروبارێن ناڤخۆ يێن عيراقێ دا تۆمه‌تبار دكه‌ت.
حه‌سه‌ن كه‌ريم كه‌عبى، جێگرێ ئێكێ يێ سه‌رۆكێ جڤاتا نوونه‌رێن عيراقێ، داخواز كر كو ياداشته‌كا نه‌رازيبوونێ بده‌نه بالوێزێ بريتانيا ل به‌غدا، جۆن ويلكس، ژ ئه‌گه‌رێ ئه‌وێ ده‌ستێوه‌ردانا د كاروبارێن ناڤخۆ يێن عيراقێ دا كرى.
كه‌عبى داخواز ژى كريه كو بالوێزخانه و نوونه‌راتى د چارچۆڤێ رێكارێن قانوونى و قانوونا نێڤده‌وله‌تى دا كار بكه‌ن و رێزێ ل شكۆ و سه‌روه‌ريا عيراقێ و كاروبارێن ناڤخۆ بگرن و ده‌ستێوه‌ردانێ نه‌كه‌ن.
به‌رى نوكه ژى ئه‌حمه‌د مه‌حجۆب ئاخفتنكه‌رێ وه‌زاره‌تا ده‌رڤه يا عيراقێ سه‌رسورمانا خوه د گۆتنێن بالوێزێ بريتانيا ل عيراقێ ده‌ربڕى بوو.
بالوێزێ بريتانيا ل عيراقێ، جۆن ويلكس، د تويته‌كى دا كو ل تۆڕا تويته‌رى به‌لاڤكريه، راگه‌هاند بوو كو رێكه‌فتنه‌كا بريتانى، ئه‌مريكى، و ئيرانى هه‌يه بۆ دامه‌زراندنا كابينا نوو يا حوكمه‌تا عيراقێ.
