جڤاتا وه‌زيران پرۆژه قانوونا چاكسازيێ د مووچه‌ى وخانه‌نشينيێ دا په‌سه‌ندكر
ئه‌ڤرۆنيوز:
جڤاتا وه‌زيران ل هه‌رێما كوردستانێ پرۆژه قانوونه‌ك ل دۆر چاكسازيێ د وه‌زيفه‌يا گشتى ومووچه‌ى وخانه‌نشينيێ دا په‌سه‌ندكر.
ئه‌ڤرۆ پێنج شه‌مبى 21/12/2017، به‌ياننامه‌ك ژلايێ جڤاتا وه‌زيران هاته ده‌ركرن ل دۆر كۆمبوونا خوه يا ئه‌ڤرۆ كو پشكه‌ك ژوێ كۆمبوونێ ل دۆر چاكسازيێ د مووچه‌ى فه‌رمانبه‌ران دابوو.
د پشكا تايبه‌ت ب مووچه‌ى ڤه دوێ به‌ياننامێ دا، هاتيه” ره‌شنڤيسێ قانوونا چاكسازيێ ورێكخستنا كه‌رتێ وه‌زيفه‌يا گشتى وخانه‌نشينيێ ومووچه وده‌رماله وبه‌خشين وئيمتيازاتێن دى ل هه‌رێما كوردستانێ كه‌فته به‌ر دانوستاندنێ وژلايێ ئامانج ره‌حيم سكرتێرێ جڤاتا وه‌زيران ناڤه‌رۆك وهوورده‌كاريێن پرۆژه قانوونێ بۆ به‌رهه‌ڤبوويان شرۆڤه‌كر، كو ئه‌ڤ پرۆژه قانوونه ل دووماهى كۆمبوونا هه‌ڤپشك يا په‌رله‌مان وحوكمه‌تا هه‌رێما كوردستانێ بنه‌مايێن سه‌ره‌كى كه‌فتنه ب ئاراسته‌يا رێكخستنا كه‌رتێ وه‌زيفه‌يا گشتى وخانه‌نشينى ل هه‌موو كه‌رتێن شارستانى وله‌شكرى وهێزێن ئاسايشا ناڤخوه وهه‌روه‌سا ته‌رخانكريێن چاڤدێريا جڤاكى وبه‌رپاكرنا دادپه‌روه‌ريێ وئێكسانيێ دخه‌رجكرنا مووچه وده‌رماله وبه‌خشين وئيمتيازاتێن دارايى يێن گشتى يێن دى وبه‌رگرتن ل مفا وه‌رگرتنا نه‌ره‌وا ونه قانوونى ژ ته‌رخانكريێن بودجه‌يا گشتى ول پێناڤى زامنكرنا مووچه‌يێ مووچه‌خۆر وخانه‌نشين وكه‌سوكارێن شه‌هيدان وئه‌نفالكريان وكێك ئه‌ندام وخودان پێدڤيێن تايبه‌ت ومفادارێن دى يێن شايسته‌يا چاڤدێريا جڤاكى ل هه‌رێما كوردستانێ، بۆ وێ چه‌ندێ كو مووچه‌خۆرێ راسته‌قينه‌يێ شايسته‌ى، نه‌بيته قوربانيێ خه‌لكێ نه‌شايسته”.
به‌ياننامێ ئاماژه دا” پشتى پێشكێشكرنا چه‌ند تێبينى وسه‌رنجان ژلايێ به‌رهه‌ڤبوويان ڤه، جڤاتا وه‌زيران پرۆژێ قانوونێ په‌سه‌ندكر وده‌ستخوه‌شى ل به‌رهه‌ڤكارێن پرۆژه قانوونێ كر ل سه‌رۆكاتيا جڤاتا وزيران وهنده‌ك لژنێن په‌رله‌مانى وده‌زگه‌هێن چاڤدێريا دارايى وده‌ستپاكيێ وداواكارێ گشتى وجڤاتا شوورا وبريار هاته دان پرۆژێ قانوونێ ئاراسته‌ى په‌رله‌مانێ كوردستانێ بهێته كرن ب مه‌ره‌ما په‌سه‌ندكرنا وى وب شێوه‌كێ بله‌ز ب كه‌ڤيته دبوارێ بجهئينانێ دا”.
ل دووڤ وێ به‌ياننامێ” په‌سه‌ندكرنا وى پرۆژه‌ى قانوونێ دێ كاريگه‌ريه‌كا به‌رچاڤ هه‌بيت دكێمكرنا خه‌رجيێن گشتى وپه‌يداكرنا دادپه‌روه‌ريێ دبوارێ ئه‌رك ومافێن مووچه‌خۆران دا”.
ل دۆر رێكخستنا مووچێ هێزين ئاسايشێ، ئاسايشا ناڤخوه‌يى وپێشمه‌رگه‌ى، پشتى به‌رچاڤكرنا چه‌ند پێشنياز وتێبينيان، جڤاتا وه‌زيران بريار دا ب راسپاردنا وێ لژنا وه‌زارى ئه‌وا كار ل سه‌ر ڤى بابه‌تى دكه‌ت، به‌رده‌وامبن ل سه‌ر كۆمبوونێن خوه هه‌تا بگه‌هيته ئه‌نجامه‌كى كو كاريگه‌ريه‌كا مه‌زن نه‌بيت ل سه‌ر ژيان وژيارا وان هێزان ب تايبه‌تى ئه‌وێن مووچێن وان ب خوه دكێم، چونكى رۆلێ ڤان هێزان دشكاندنا داعشێ دا وبه‌رگريكرن وپاراستنا ئاسايش وئاراميا وه‌لاتيێن هه‌رێما كوردستاتێ هه‌بوو وجڤاتا وه‌زيران ژى ب گرنگ وه‌ردگريت وبلند دنرخينيت.
