جڤاتا وه‌زيرێن هه‌رێما كوردستانێ كومه‌كا برياران ده‌ركر
ئه‌ڤرۆ نيوز:
ئه‌ڤرۆ رۆژا چارشه‌مبى 11-9-2019 جڤاتا وه‌يرێن هه‌رێما كوردستانێ ب سه‌رۆكاتيا مه‌سرور بارزانى سه‌رۆكێ حوكمه‌تا هه‌رێما كوردستانێ كومبوون.
ده‌سپێكا كومبوونێ سه‌رۆكێ جڤاتا وه‌زيران ڤه‌رێژا كومبوونا وى يا به‌رى نوكه ل رۆژا 8-9-2019 دگه‌ل فراكسيونێن كوردى و ئه‌ندامێن كورد يێن لژنا دارايى يا په‌رله‌مانێ عيراقێ ئه‌نجامدابوو ئاشكرا كر، دڤێ كومبوونێ بريار هاته دان حه‌فتيا بهێت شانده‌كێ حوكمه‌تا هه‌رێمێ به‌ر ب به‌غدا بچيت بۆ ئه‌نجامدانا گوتوبێژان ده‌رباره‌ى پشكا هه‌رێما كوردستانێ ژ بوودجه‌يا عيراقێ يا 2020 كو نوكه مژوولى دانانا ره‌شنڤيسێ بودجێ يه ژلايێ وه‌زاره‌تا دارايى يا عيراقێ ڤه.
ديسان بريار هاته‌دان گازيكرنا لژنه‌يێن (دارايى، په‌ترول و غاز، قانوونى) يێن جڤاتا نوونه‌رێن عيراقێ بۆ هه‌رێما كوردستانێ.
رۆژا پێنج شه‌مبى 12-9-2019 شانده‌كێ حوكمه‌تا هه‌رێما كوردستانێ دگه‌ل په‌رله‌مانێ كوردستانێ كومبيت پێخه‌مه‌ت روونكرنا دانوستاندێن ناڤبه‌را حوكمه‌تا هه‌رێمێ دگه‌ل عيراقێ.
د برگه‌يه‌كا دى يا كومبوونێ دا وه‌زيرێ پلاندانێ راپورته‌ك سه‌باره‌ت پرۆژێ سه‌رژمێريا عيراقێ پێشكێشكر كو برياره ل سالا 2020 بهێته ئه‌نجامدان و دڤى ده‌رباره‌ى دا لژنه‌كا تايبه‌ت بۆ هه‌لسه‌نگاندنا پرۆژێ سه‌رژمێريێ و به‌رچاڤكرنا به‌رژه‌وه‌نديا هه‌رێما كوردستانێ ب هه‌موو پێكهاتێن وێ ڤه دياربكه‌ن.
ل دووماهيا كومبونێ گوتوبێژ ل سه‌ر ميكانزما نوو بۆ رێكخستنا باج ب شێوه‌كێ به‌رژه‌وه‌نديا گشتى هاته كرن و دڤى ده‌رباره‌ى دا جڤاتا وه‌زيران پرۆژێ په‌يره‌وا تايبه‌ت نڤێسينيێن بازرگانى په‌سه‌ند كر كو ميكانزما نوو يا باجێ ب خوه ڤه دگريت.