جڤاتا پارێزگەھا نەینەوا: دخوازین پۆلیسێن مووسل ل دەڤەرێن ئازادکری دەوامێ بکەن
ئەڤرۆ:
سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا دیار کر کو جڤاتا پارێزگەھێ ژ بڕیارا وەزارەتا ناڤخوە یا عیراقێ بۆ ڤەگوھاستنا پۆلیسێن مووسلێ بۆ بەغدا یا نەرازییە و گۆت: “ئەم دخوازین پۆلیسێن مووسلێ ل وان دەڤەرێن ژ لایێ ھێزێن پێشمەرگەی ڤە ھاتینە ئازادکرن دەواما خوە بکەن”.
سەیدۆ چەتۆ، سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا خویا کر، بەری چەندەکێ وەزارەتا ناڤخوە یا عیراقێ بڕیار دابوو کو ھەموو پۆلیسێن وان دەڤەرێن ئازادکری یێن سەر ب پارێزگەھا نەینەوا ڤە بۆ بەغدا بھێنە ڤەگوھاستن و بۆ مالپەرێ فەرمیێ پارتی گۆت: “جڤاتا پارێزگەھا نەینەوا نەرازیبوونا خوە ھەمبەر ڤێ بڕیارا وەزارەتا ناڤخوە یا عیراقێ دیارکریە و شاندەکێ ئەمنی ژی چوویە بەغدا دا کو رازی بکەن، ئەو پۆلیس نەچنە بەغدا، چونکو ئەو نوکە ل ١٢ یەکێن ئیداری یێن ژ لایێ پێشمەرگەی ڤە ھاتینە رزگارکرن دەوامێ دکەن و چار ھەیڤە ژی مووچە وەرنەگرتین”.
سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا ئاماژە ب وێ چەندێ ژی کر، ھەتا نوکە شاندێ مووسلێ چ سۆز بۆ نە ڤەگوھاستنا وان پۆلیسان بۆ بەغدا وەرنەگرتینە و گۆت: “ب تنێ بریکارێ وەزارەتا ناڤخوە یا عیراقێ سۆز دایە کو د گەل وەزیرێ ناڤخوە باخڤیت و بزاڤان بکەت پۆلیسێن ناڤخوە بۆ بەغدا نەھێنە ڤەگوھاستن.
