جڤاتێن پارێزگه‌هان ئه‌ڤرۆ كه‌فتنه د ڤالاتيا قانوونى دا
ئه‌ڤرۆ نيوز، نيوار محه‌مه‌د سه‌ليم:
سه‌رۆكێ جڤاتا پارێزگه‌ها دهۆكێ راگه‌هاند كو ژ ئه‌ڤرۆ جڤاتێن پارێزگه‌هان كه‌فتنه د ڤالاتيا قانوونى دا و نه‌شێن چو بڕياران ده‌ربكه‌ن و دا زانين كو دێ چاڤه‌رێ په‌رله‌مانى يان جڤاتا وه‌زيران كه‌ن، بڕياره‌كێ ل دۆر چاره‌نڤيسێ جڤاتا ده‌ربكه‌ن.
فه‌هيم عه‌بدولا حه‌مۆ، سه‌رۆكێ جڤاتا پارێزگه‌ها دهۆكێ بۆ ئه‌ڤرۆ نيوز گۆت: “وه‌كو يا پێشبينى كرى، ئه‌ڤرۆ جڤاتێن پارێزگه‌هان كه‌فتنه د ڤالاتيا قانوونى دا”.
زێده‌تر گۆت: “يا دروست ئه‌و بوو كو هه‌لبژارتنێن جڤاتێن پارێزگه‌هان ژى ل گه‌ل په‌رله‌مانێ كوردستانێ هاتبانه كرن دا كو ژ ڤێ ئاريشێ ب دووماهى هاتبان”.
سه‌رۆكێ جڤاتا پارێزگه‌ها دهۆكێ ئاشكه‌را ژى كر هه‌كه شيان ل گه‌ل هه‌لبژارتنێن جڤاتێن پارێزگه‌هان ل عيراقێ ئه‌نجام بده‌ن دێ تشته‌كێ باش بيت، به‌لێ هه‌كه نه دبيت بچنه بهارا سالا بهێت و گۆت: “يا دروست ئه‌و بوو ل گه‌ل هه‌لبژارتنێن په‌رله‌مانێ كوردستانێ هاتبانه كرن چونكو ب راستى ژى خه‌لك ب ڤان هه‌لبژارتنان ڤه وه‌ستيان”.
ب گۆره‌يى قانوونێ چار سال و سێ هه‌يڤ ب سه‌ر ماوێ قانوونى يێ جڤاتێن پارێزگه‌هان ڤه بۆرين و ئێدى كه‌فتنه ڤالاتيا قانوونى و هه‌ر وه‌كو فه‌هيم عه‌بدولا حه‌مۆ دايه دياركرن ئێدى جڤاتێن پارێزگه‌هان نه‌شێن چو بڕياران ده‌ربكه‌ن.
خۆيا ژى كر كو ئه‌و پێشبينى دكه‌ت پشتى هه‌لبژارتنان بڕياره‌ك بۆ درێژكرنا ماوێ جڤاتێن پارێزگه‌هان بهێته ده‌ركرن ژ به‌ر كو نها هه‌موو لايه‌ن مژوولى هه‌لبژارتنانه.
