جۆن كيرى: ژێده‌رێن دارايى يێن داعش يێن لاواز بووين
ئه‌ڤرۆ نيوز:
جۆن كيرى، ئاخفتنكه‌رێ ب ناڤێ وه‌زاره‌تا به‌ره‌ڤانيا ئه‌مريكا (په‌نتاگۆن)ێ راگه‌هاند كو نه‌يا گۆنجايه هه‌لسه‌نگاندنا ستراتيژيه‌تا ئه‌مريكا بۆ روو ب رووى بوونا داعش ل سوريا و عيراق د ماوێ سێ هه‌يڤێن ده‌سپێكى دا بهێته كرن.
جۆن كيرى بۆ ده‌زگه‌هێن رۆژنامه‌ڤانى گۆت: “بزاڤا دژى داعش ده‌ست كه‌فت هه‌بووينه و ئه‌م دزانين ئه‌ڤێ كارتێكرنه‌كا مه‌زن يا ل سه‌ر داعش ل عيراق و سوريا كرى”.
ئه‌ڤى سه‌ركردێ ئه‌مريكى ئاماژه ب وێ چه‌ندێ ژى كر كو نوكه ئه‌وان ل سوريا داهاتێ داعش لاواز كريه و به‌ر ب نه‌مانێ يه، ئه‌وێ ژ پالاوگه‌هان دگه‌هشتنێ ژ ئه‌گه‌رێ دربێن ئه‌سمانى يێن ئه‌مريكا و هێزێن هه‌ڤپه‌يمانان.
كيرى گۆتژى: “ئه‌ڤان دربێن ئه‌سمانى گه‌له‌ك ژ بنگه‌هێن وان يێن راهێنانێ و ئاميرێن وان يێن سه‌ربازى و جهێن سه‌ركردێن وان و بن كۆنترۆلا وان ژ ناڤبرينه”.
هه‌ر ديسا ئه‌و چه‌نده ژى ئاشكه‌را كر كو ئه‌ڤان دربێن ئه‌سمانى ب سه‌دان كه‌س ژ رێكخستيا داعش يێن كوشتن و نه‌هێلاينه ل گه‌له‌ك ده‌ڤه‌ران ژى پێشره‌ويێ بكه‌ن.
ئاخفتنكه‌رێ ب ناڤێ په‌نتاگۆن نه‌ڤه‌شارت كو ل ڤى ماوه‌يى داعش يا بزاڤێ دكه‌ت هژمارا خوه زێده‌ت كه‌ت و دبيت ل چه‌ند ده‌ڤه‌ران بزاڤێ بكه‌ت هنده‌ك پێشره‌ويان بكه‌يت و يا سه‌ركه‌فتى ژى بيت و گۆت: “به‌لێ ده‌م نه د به‌رژه‌وه‌ندا وێ دايه”.
