جیگرێ سەرۆکێ CHP: دڤێت PKK توندوتیژیێ و حوکمەت ژی ئۆپەراسیۆنان رابگرن
ئەڤرۆ نیوز:
جێگرێ سەرۆکێ CHP راگەھاند کو ئەو ناھێلن ئەڤ شەرە بەردەوام بیت و گۆت: (مافێ چو کەس و ئالیەکی نینە زارۆیێن خەلکێ ل ژێر ناڤێ پاراستنا وەلاتی بدەتە کوشتنێ و دڤێت PKK ژی د زووترین دەم دا دەستێن خوە ژ چەکان بکێشینیت و ئۆپەراسیۆنێن سەربازی ژی بھێنە راوەستاندن و ئەم ھەموو پێکڤە ل پەرلەمانی پرسگرێکێن وەلاتی چارە بکەین).
گورسەل تەکین جێگرێ سەرۆکێ پارتا کۆماری یا گەل (CHP) د داخۆیانیەکی دا بۆ رۆژناما ئەڤرۆ ل سەر رەوشا داوی یا تورکیا و رۆژھەلاتا ناڤین راگەھاند کو مخابن سیاسەتێن شاش یێن حوکمەتێ و یێن ئالیێن کوردی وەلات بەر ب رەوشا شەرەکی دژوار و بێ واتە ڤە بریە و دیسا زارۆیێن خەلکێ دھێنە کوشتن و گۆت: (مە د دەستپێکا قۆناغا ئاشتیێ دا ژ ھەر دو ئالیان را ژی گۆت، پرسگرێکا کوردی و پرسێن گرنگ یێن وەلاتی دڤێت ل پەرلەمانی بھێنە چارەکرن لێ ھەر دو ئالیان ژی گۆھداریا مە نەکرن و قۆناغ ب زەلالی نە مەشاندن و ئەڤرۆ دیسان وەلات بوویە ئاگر و زارۆیێن مە دھێنە کوشتن).
جێگرێ سەرۆکێ CHP ھەروەسا راگەھاند ژی ئەو وەک پارتا کۆماریا گەل ل دژی ھەموو کریارێن توندوتیژیێ نە و بنگەھێ چارەکرنا ھەموو پرسگرێک و کێشەیان پەرلەمانە و ھەموو کریارێن توندوتیژیێ ژی رەت دکەین و گۆت: (دڤێت PKK دەست ژ چەکی بەردەت و دڤێت حوکمەت ھەموو ئۆپەراسیۆنێن سەربازی و سیاسی راوەستینیت و ئەم ھەموو ئالیێن ل پەرلەمانی دەستێ خوە بدەنە ھەڤدو و نەھێلن شەر وەلاتێ مە وێران بکەت).
ل سەر داخستنا پارتا دیمۆکراسیا گەلان HDP ژی گورسەل تەکین راگەھاند کو ئەو قەبوول ناکەن پارتەکا کو ٨٠ پەرلەمانتارێن وێ ھەبن بھێتە داخستن و گۆت: (ھزرا داخستنا پارتێن سیاسی ب خوە ھزرەکا شاش و ل دژی دیمۆکراسیێ و مافێ مرۆڤی دبینین و ئەم قەبوول ناکەین HDP کو ١٣% دەنگێن خەلکێ وەرگرتینە بھێتە دخستن، چونکو داخستنا HDP دێ وەلاتی ئێخینتە د رەوشەکا جودابوونێ دا و کورد وی دەمی دێ بێژن ھەکە دەریێ پەرلەمانی بۆ مە داخستی بیت ئەم ژی دێ ب دەستێ خوە چارەنڤیسێ خوە دیار کەین و وی دەمی دێ رەوشا وەلاتێ مە ژ یا عیراقێ و سووریێ ژی خرابتر بیت، بۆ ڤێ چەندێ دڤێت کەس بەحسێ داخستنا HDP و چو پارتەکا سیاسی نەکەت).
ل سەر گەنگەشەیێن د ناڤبەرا CHP و ئاکپارتی دا بۆ ئاڤاکرنا حوکمەتەکا ھەڤپەیمانی ژی گورسەل تەکین جێگرێ سەرۆکێ CHP راگەھاند کو گەنگەشەیێن وان ل گەل ئاکپارتی بەردەوام دکەن لێ ھەتا نھا نەگەھشتنە ھەڤپەیمانیەکێ و گۆت: (ئەم بۆ ئاڤاکرنا حوکمەتا ھەڤپەیمانیێ ئامادە ینە لێ دڤێت ھندەک خال بھێنە زەلال کرن و د سەری دا ژی دەستێوەردانێن سەرۆک کۆماری د ناڤا کاروبارێن حوکمەتێ دا و ھندەک خالێن دی، نھا ھێشتا زوویە ئەم بێژین حوکمەتا ھەڤپەیمان ئاڤا ببیت و ئەم ناخوازین وەلات بێی حوکمەت بمینیت).
ل ئالیێ دی ب دەستپێشخەریا مرۆڤێن ئاقلمەند شاندەکێ بەرفرەە یێ چارەکرنا پرسگرێکان دێ د ناڤ دو رۆژێن بھێت دا ل گەل حوکمەتێ، CHP و HDP ھەڤدیتنان ساز کەن و دھێتە چاڤەرێ کرن شاندێ ئاقلمەندان پشتی ڤان ھەڤدیتنان سەرەدانا قەندیلێ بکەت و ژ بەرپرسێن PKK بخوازیت کو ھێزێن خوە ڤەکێشنە بنگەھێن خوە یێن سەربازی یێن بەری دەستپێکرنا شەری.
